وەلاتیێن تورکـیا داخـوازا هـەلبژارتنێن پێشوەخـت دکـەن
کۆمپانیەکا راپرسیان ل تورکیا دیار کریە ژ بەر رەوشا خراب یا ئابووری ل تورکیا باوەریا خەلکی ب دەستهەلاتا ئاکپارتیێ گەلەک کێم بوویە و خەلک داخوازا هەلبژارتنێن پێشوەخت دکەن و هەکە نها هەلبژارتن بهێنە کرن پارتا کۆماریا گەل دێ بیتە پارتا ئێکێ ل سەر ئاستێ تورکیا.
کۆمپانیا یونەیلەم یا راپرسیان دیار کر، دەستپێکا ڤێ مەهێ ڤان دەست ب راپرسیەکا بەرفرەه ل پڕانیا باژێرێن تورکیا کرینە و پتر ژ سێ هزار کەسان پشکداری د راپرسیێ دا کرینە و ل گۆر ئەنجامێ راپرسیا وان هەکە نها ل تورکیا هەلبژارتنێن پەرلەمانی بهێنە کرن پارتا کۆماریا گەل دێ پتر ژ ٣٤٪ دەنگان بدەستڤە ئینیت و دێ بیتە پارتا ئێکێ ل سەر ئاستێ تورکیا و رێژەیا دەنگێن ئاکپارتیێ ژی ب رەنگەکێ بەرچاڤ کێم بووینە و هەکە نها هەلبژارتن بهێنە کرن دێ ئاکپارتی نێزیکی ٣١٪ ژ دەنگان بدەستڤە ئینیت و ئەو یەک ژی نیشا ددەت رێژەیا پشتەڤانیا خەلکی بۆ پارتا کۆماریا گەلەک زێدەتر لێ هاتیە.
هەمان کۆمپانیێ ئەو یەک ژی دیار کریە، د ئەنجاما راپرسیا وان دا پتر ژ ٧٠٪ ژ پشکداربوویان دیار کرینە، تورکیا د قەیرانەکا گەلەک مەزن یا ئابووری دایە و ئاکپارتیێ ژی چو بەرنامە بۆ چارەسەرکرنا قەیرانا ئابووری نینن و ژ بەر ڤێ یەکێ ژی دڤێت هەلبژارتنێن پێشوەخت یێن پەرلەمانی ل تورکیا بهێنە کرن.
سەبارەت ب ڤێ یەکێ کا نها پرسا سەرەکی یا تورکیا چیە ژی پڕانیا پشکداربوویان دیار کرینە، نها پرسا سەرەکی ل تورکیا ئابووری یە، چونکی تورکیا د قەیرانەکا گەلەک مەزن یا ئابووری دایە و ئاکپارتی ژی نەشێت قەیرانا ئابووری چارەسەر بکەت، ژ بەر ڤێ یەکێ ژی دڤێت هەلبژارتنێن پێشوەخت بهێنە کرن دا دەستهەلاتەکا نوو ل تورکیا بهێتە سەر کاری و بشێت قەیرانێن هەی چارەسەر بکەت.
هەمان کۆمپانیێ ئەو یەک ژی دیار کریە پڕانیا پشکداربوویێن راپرسیێ وەسا دبینن دستوورێ نها یێ تورکیا ژی نەشێت ببیتە ژێدەرێ چارەسەریێ و پێدڤیا تورکیا ب دستوورەکێ نوو هەیە، دستوورەک نوو و دیموکراتی کو بشێت ببیتە ژێدەرێ چارەسەریا هەموو پرسێن نها یێن ل تورکیا.
ئەو یەک د دەمەکێ دایە کو بەری چەند رۆژان ئۆزگور ئۆزەل سەرۆکێ پارتا کۆماریا گەل ژی دیار کربوو، وەکو پارتا هەری مەزن یا ئۆپۆزسیۆنێ کو د هەلبژارتنێن ٣١ ئادارێ دا ژی بووینە پارتا ئێکێ ل تورکیا وان دڤێت هەلبژارتنێن پێشوەخت ل تورکیا بهێنە کرن، چونکی دەستهەلاتێ چو پرۆژە بۆ چارەسەرکرنا پرسێن نها ل تورکیا نینن و وەکو پارتا کۆماری ئەو دشێن پرسا کوردی ژی ل پەرلەمانێ تورکیا چارەسەر کەن.
سەرۆکێ پارتا کۆماریا گەل ئەو یەک ژی دیار کربوو، دڤێت دەستهەلاتا نها راستیا هەی قەبوول بکەت و بەرهەڤیان بۆ هەلبژارتنێن پێشوەخت بکەت، چونکی بەردەوامیا رەوشا نها دێ تورکیا تووشی کارەساتێن گەلەک مەزن کەت و پێدڤیا تورکیا ب دستوورەکێ نوو و دەستهەلاتەکا نوو و دیموکراتی هەیە، ئاکپارتیێ سەلماند ئەو نەشێن سیستەمێ تورکیا بکەنە دیموکراتی، بەرۆڤاژی داخوازیێن خەلکی، ئاکپارتیێ ب رێیا هندەک گوهۆڕینان سیستەمێ تورکیا بەر ب پاشڤە بر و ئەو یەک ژی بوویە ئەگەر وەلاتێن ئێکەتیا ئۆرۆپا و هێزێن دیموکراتیخواز خوە ژ تورکیا دوور بکەن.
ل ئالیێ دی وەلاتیێن کورد ل باکورێ کوردستانێ و تورکیا ژی وەسا دبینن دڤێت هەلبژارتن بهێنە کرن، لێ د هەمان دەمی دا باوەریا کوردان ب پارتا کۆماریا گەل ناهێت، چونکی وەلاتی وەسا دبینن پارتا کۆماری چو پرۆژە بۆ چارەسەرکرنا پرسا کوردی نینن و یا نها پارتا کۆماری بەحس ژێ دکەت تنێ بۆ بدەستڤەئینانا دەنگێن کوردانە، چونکی هەتا نها ژی پارتا کۆماری پشتەڤانیێ ل پەروەردا ب زمانێ کوردی ل تورکیا ناکەت.
چاڤدێرێن سیاسی ژی دیار دکەن، سیاسەتا دەرڤە یا تورکیا تووشی قەیرانەکا گەلەک مەزن یا هاتی، تورکیا ژ ئەمریکا و وەلاتێن رۆژئاڤایی دوور کەفتیە و ژ بەر ڤێ یەکێ ژی رەوشا ئابووری یا تورکیا گەلەک خرابە و ئێدی باوەریا وەلاتیان ژی ب دەستهەلاتا ئاکپارتیێ نەمایە، خەلک داخوازا هەلبژارتنێن پێشوەخت ل تورکیا دکەن.
دەزگەهێن راگەهاندنا تورکیا ژی دیار دکەن، ئەڤرۆکە هەموو وەلاتی بەحسێ قەیرانا ئابووری دکەن، چونکی وەلاتی ب زەحمەت دشێن پێدڤیاتێن سەرەکی یێن ژیانا رۆژانە بۆ خوە دابین بکەن و ل ئالیێ دی رێژەیا بێکاریێ ژی ل تورکیا گەلەک زێدە بوویە، باوەریا گەنجان ب ژیانەکا ئاسایی نەمایە و ژ بەر ڤێ یەکێ ژی خەلک داخوازا گوهۆڕینا دەستهەلاتا نها ل تورکیا دکەن، لێ د رەوشا نها دا ئاکپارتیێ نەڤێت چو هەلبژارتن ل تورکیا بهێنە کرن.
