كرێكارێن ل سەر كاری گیانێ خوە ژ دەست ددەن دێ هێنە خانەنشینكرن
هەولێر، قائید میرۆ:
بەرپرسەكێ وەزارەتا كار و كاروبارێن جڤاكی یا حوكمەتا هەرێما كوردستانێ دیار كر، هەر كرێكارەكێ د دەمێ كاركرنێ دا كێم ئەندام ببیت، یان ژی گیانێ خۆ ژ دەست بدەت، ل گورەی قانوونا خانەنشین و دەستەبەرا جڤاكی دێ هێتە خانەنشینكرن.
نزمی مووسا، جێگرێ رێڤەبەرێ گشتیێ كار و دەستەبەرا جڤاكی بۆ رۆژناما ئەڤرۆ دیار كر، ل گورەی قانوونا خانەنشین و دەستەبەرا جڤاكی یا هژمارە 39 یا سالا 1971 یا راستڤەكری ل سالا 2012ێ، هەر كرێكارەكێ د دەمێ كاری دا گیانێ خۆ ژ دەست بدەت، یان ژی كێم ئەندام ببیت، ئەڤە ل گورەی قانوونێ بێ مەرج دێ هێتە خانەنشینكرن، هەر كرێكارەكێ 30 سال خزمەت هەبن و ژییێ وی نەگەهشتبیتە خانەنشینیێ دشێت خۆ هانەنشین بكەت.
نزمی مووسا گۆت: «هەر كرێكارەكێ ل سەر كاری گیانێ خۆ ژ دەست بدەت و نەهاتبیتە دەستەبەركرن، كەسوكارێن وی دشێن ل دادگەها كاری سكالایێ تۆمار بكەن و بەلێندەر و خودانێ كاری دێ هێنە نەچاركرن پارێ دەستەبەرا جڤاكی بدەن و كرێكار بهێتە خانەنشینكرن».
