ب هەلكەفتا سالڤەگەڕا ڕیفڕاندۆمێ ناڤەندا خانی ئاهەنگەكا جەماوەری گێـڕا
ل ژێر چاڤدێریا ناڤەندا خانی یا رەوشەنبیری و راگەهاندنێ و ب هەلكەفتا 25/9 سالڤەگەڕا ڕیفڕاندۆما سەرخوەبوونا كورستانی، دوهی 25/9/2024 تێلەفزیۆنا دهۆك ب هەڤكاری ل گەل لیژنا ناوچا پێشكەفتن یا پارتی، ئاهەنگەكا جەماوەری ب بەرهەڤبوونا ئیسماعیل محەمەد، نوورێ پارێزگارێ دهۆكێ و ئیحسان ئامێدی، بەرپرسێ ناڤەندا خانی و هەژمارەكا زۆر یا كادر و مەدیاكار و نڤیسەر و رەوشەنبیران ل پاركا بارزانی گێڕا.
هەلكەفت عەبدولواحد، رێڤەبەرێ دهۆك تیڤی ل دەستپێكا ئاهەنگێ پەیڤەك پێشكێشكر و تێدا بەحسێ سالڤەگەڕا ڕیفڕاندۆما سەرخوەبوونا كوردستانێ كر، دیسا دیار كر كو دوهی 25/9/2024 دو هەلكەفتێن گرنگ بوون، ئەو ژی سالڤەگەڕا ڕیفڕاندۆما سەرخوەبوونا كوردستانێ و دەستپێكرنا بانگەشەیا هەلبژارتنێن پەرلەمانێ كوردستانێ نە و خواست دەنگی ب لیستا پارتی یا هژمار 190 بهێتەدان، چونكی ب تنێ ئەو دشێت بەرەڤانیێ ژ مافێن گەلێ كوردستانێ و بكەت و قەوارەیێ هەرێما كوردستانێ ب پارێزیت.
دیسا ئیحسان ئامێدی، بەرپرسێ ناڤەندا خانی یا رەوشەنبیری و راگەهاندنێ پەیڤەك پێشكێشكر و تێدا ئاماژە دا سالڤەگەڕا ڕیفڕاندۆما سەرخوەبوونا كوردستانێ و ل دۆر دەستپێكرنا بانگەشەیا هەلبژارتنێن پەرلەمانێ كوردستانێ گۆت: «لیستا پارتی یا هژمار 190، لیستا شەهیدان و ئارامی و ئاڤەدانی و پێكڤەیی و خۆڕاگریێ یە، لەو ئەم دخوازین وەتیێن ب شەرەفێن پارێزگەها دهۆكێ دەنگێ خوە بدەنە لیستا پارتی دیموكراتی كوردستان».
ل دووماهیێ ژی ئاهەنگا هونەری دەستپێكر و چەندین هەلبەست و سترانێن نەتەوی و شۆڕەشگێری هاتنە پێشكێشكرن.
