فەستیڤالا دویێ یا بەرهەمێن خۆمالی ل دەڤەرا بەرواریان دێ هێتە گێـڕان
زنار تۆڤی:
فەستیڤالا دویێ یا بەرهەمێن خۆمالی ل دەڤەرا بەرواریان دێ هێتە گێڕان و هەتا نوكە بەرهەڤیێن گەلەك باش هاتینە كرن.
فەهمی بالایی، پەیڤدارێ فەستیڤالا بەرهەمێن خۆمالی ل دەڤەرا بەرواریان، بۆ رۆژناما ئەڤرۆ دیار كر، ل رۆژا 10/10/2024 فەستیڤالا دویێ یا بەرهەمێن خۆمالی ل دەڤەرا بەرواریان ل كۆمەلگەها بریفكا دێ هێتە گێڕان و بۆ دەمێ سێ رۆژان دێ یا بەردەوام بیت، ئەڤ سالە هژمارا خیڤەتان د ناڤا فەستیڤالێ دا دێ بنە 100 خیڤەت و ل سێ جهێن جودا دێ هێنە ڤەدان، كو جهەك بۆ بازارێ بەرهەمێن خۆمالی و ئێك بۆ كارێن دەستی و یا دیتر ژی بۆ خوارنگەهان و فرۆتنا خوارنێن كوردی هاتییە دروستكرن، هەروەسا ئەڤ سالە چەندین پارك بۆ راوەستاندنا ترۆمبێلان ژی هاتینە چێكرن.
ناڤهاتی گۆت: «ئەڤ سالە مە گرنگی دایە بەرهەمێن خۆمالی یێن هەموو كوردستانێ، هەروەسا گرۆپێ ژنێن سنە یێ هونەر و موزیكێ ژ رۆژهەلاتێ كوردستانێ، ل گەل هونەرمەند حەسەن شەریفی و هشیار بەرواری ژ باكوورێ كوردستانێ و سەفقان ئۆركێش ژ رۆژئاڤایێ كوردستانێ دێ پشكدارییێ د فەستیڤالێ دا كەن، گۆڤەندێن كوردی ژ لایێ گرۆپێن مللی ڤە دێ هێنە كرن، ب تایبەتی ژی ژ لایێ گرۆپێ مللی یێ دهۆكێ و گرۆپێ كریستیانان، دیسا چەندین چالاكیێن دیتر ژی دێ هێنە ئەنجامدان، د هەمان دەم دا دەڤەرا بەرواری بالا دەڤەرەكا شوونواری و گەشتیاری و ب چاندنێ ژی یا ناڤدارە، مە گرنگیەكا تایبەت ب وان بیاڤان دایە، ئەڤ فەستیڤالە ب هاریكاریا سەرۆكاتیا هەرێما كوردستانێ و حوكمەتا هەرێما كوردستانێ و سازیێن حزبی و رێكخراوێن جەماوەری و خەلك و كەساتیێن دەڤەرێ دێ هێتە گێڕان».
