نێزیكی 110 هزار گول ل باخچەیێن گشتی و ناڤەندێن جاددەیێن دهۆكێ دێ هێنە چاندن
هەرهین محەمەد:
رێڤەبەرێ ئەندازەیا پاركان دیاركر ژ بۆ وەرزێ پایزێ ل باخچەیێن گشتی و ناڤەندێن جاددەیان 110 هزار گولێن وەرزی هێنە دێ چاندن، دیسا 400 دار ژی د ناڤ پارێزگەها دهۆكێ دا دێ هێنە چاندن.
ئەندازیار كاروان سالح، رێڤەبەرێ ئەندازەیا پاركان بۆ رۆژنامەیا ئەڤرۆ گۆت: «نوكە دو پارك د قووناغا بجهئینانێ دانە و بڕیارە ئەڤ سالە ب دووماهی بهێن، هەروەسا چار باخچە ل نزاركێ ئەڤ سالە ب دووماهی هاتینە، ژ لایێ سەخبێریێ ڤە نێزیكی 400 داران د ناڤ سەنتەرێ باژێرێ دهۆكێ دا دێ هێنە چاندن، هاڤینەكا درێژ و گەرم ل سەر مەدا دەربازبوو، مە كۆمەكا زیانان هەیە، ل دهۆكێ مە دو وەرز هەنە، بەری چلێ هاڤینێ و بەری چلێ زڤستانێ، وەرزێ سەرەكی نوكە ئەم یێن تێدا وەكو: ئامادەكاری نێزیكی 110 هزار گولێن وەرزی د ناڤ پارك و ناڤەندێن جاددەان دا دێ هێنە چاندن، كو بەرهەمێن گولخانەیێن مەنە».
ناڤهاتی زێدەتر گۆت: «ل رۆژهەلاتێ دهۆكێ مە كێمیا كەسكاتیێ یا هەی، وەكو پارك و باخچەیێن د ناڤ گەرەكان دا، بەلێ ب تەمامكرنا پاركا سەرهلدان، ئەو بابەتە ل نك مە نامینت، كو خەلك ل ناڤەندێن جاددەیان ب روونیتە خواری، بەری نوكە ئەم نەدشیاین قەدەغە بكەین، چونكو چ جهـ نەبوون، لێ پشتی پاركا سەرهلدان تەمام دبیت، دێ جه هەبیت و ئەم ب هیڤی نە ئەو دیاردەیە نەمینیت».
