ئه‌مریکا و ئسرائیلێ ئێرشی چەندین دەڤەران ل سووریێ کرن
ل دووڤ ژێده‌رێن هه‌رێمی شەڤا بۆری گرۆپێن چەکدارێن سەر ب ئیرانێ ل دێرازۆرێ ب درۆنان خوا‌ستینه ئێرشی هێزێن ئه‌مریکا بکه‌ن، لێ هێزێن ئەمریکا هەر زوو ئێرشا وان ژناڤبرینە و فرۆکێن شەڕی یێن ئەمریکا شەڤا بۆری ئێرشی بنگەهێن سەربازی یێن هێزێن سەر ب ئیرانێ و رژێما بەشاری ل دەوروبەرێن دێرازۆرێ کرینە و د ئەنجاما ئێرشێ دا گەلەک چەکدار هاتینە کوشتن و بریندار بووینە و چەندین بنگەهێن سەربازی ژی ب تەمامی وێران بووینە.
ل ئالیێ دی دوهی دەزگەهێن راگەهاندنا سووریێ ژی دیار کرن کو فرۆکێن شەڕی یێن ئسرائیلێ ژی ل باژێرێ حومسی ئێرشی فرۆکەخانا سەربازی یا رژێما سووریێ و چەند بنگەهێن سەربازی کرینە، لێ هەتا نها ژی رژێما سووریێ ب فەرمی بەحسێ زیانێن وێ ئێرشێ نەکرینە.
چاڤدێرێن سیاسی ژی وەسا دبینن ئالۆزیێن نها د ناڤبەرا ئیرانێ و ئسرائیلێ دا دێ کاریگەریا خوە ل سەر سووریێ ژی هەبیت و دبیت رەوشا سووریێ گەلەک ئالۆز ببیت.
