داخاز دهێته كرن سه‌روكێ یانا به‌رشه‌لونه بهێته زیندانكرن
ئه‌ڤرۆ نیوز، زنار زوبێر:
داواكارێ گشتى یێ ئسپانیا داخواز ژ دادگه‌ها بلند یا ئسپانیا كر سه‌روكێ نوكه یێ یانا به‌رشه‌لونه جوزێ ماریا بارتومیو بۆ ماوێ چار سالان بهێته زیندانكرن.
د ڤى چارچوڤه‌ى دا داواكارێ گشتى ئه‌ڤرۆ ب فه‌رمى د راپورتا خوه دا ل دۆر كه‌یسێ سه‌روكێ یانا به‌رشه‌لونه یێ نوكه و یێ كه‌ڤن ساندرو روسێل ده‌رباره‌ى ئه‌وان سه‌رپێچیێن د هه‌ڤبه‌ستا نێمارى و ره‌ڤینا وان ژ دانا باجێ داخواز ژ دادگه‌ها بلند یا ئسپانیا دكه‌ت سه‌روكێ نوكه یێ به‌رشه‌لونه جوزێ ماریا بارتومیو بۆ ماوێ چار سالان بهێته زیندانكرن و دیسان یێ به‌رى نوكه ساندرو روسێل بۆ ماوێ حه‌فت سالان بهێته زیندان كرن ژ به‌ر ئه‌وان سه‌رپێچین وان د هه‌ڤبه‌ستا نێمارى دا كرین و ژ باجا ده‌وله‌تێ ژى ره‌ڤین و خوه ڤه‌دزین.
به‌رى نوكه سه‌ۆوكێ یانا به‌رشه‌لونه بارتومیو به‌رامبه‌ر دادگه‌هێ ئاماده‌ببوو و دیاركربوو كو وى چو په‌یوه‌ندى ب ڤێ چه‌ندێ ڤه نینه ئه‌وا هاتیه رویدان سه‌روكێ به‌رى نوكه ساندرو روسێل به‌رپرسه ژ ڤێ چه‌ندێ لێ داواكارێ گشتى ئه‌ڤ تاوانه دا پال بارتومیو ژى ژ به‌ركو ل وى ده‌مێ ئه‌و جێگرێ سه‌روكێ یانێ بوو له‌ورا ئه‌و ژى به‌رپرسیاره ژ ڤێ تاوانێ.
