ب گوژمێ پتری 25 ملیار دیناران بەرێ بنیاتی بۆ هەژمارەكا پڕۆژەیان هاتە دانان
د. عەلی تەتەر، پارێزگارێ دهۆكێ و ب ئامادەبوونا ئیسماعیل محەمەد، دەڤەردارێ دهۆكێ و سەرۆكێ باژێرڤانیا دهۆكێ ل رۆژا 14/10/2024 بەرێ بنیاتی بۆ قێركرنا جاددە و نووژەنكرنا شوستەیێن د ناڤ سەنتەرێ باژێرێ دهۆكێ دا ب گوژمێ سێ ملیار و 622 ملیۆن دیناران دانا.
پارێزگارێ دهۆكێ دوپاتكر، ل دووڤ راسپاردێن مەسرور بارزانی، سەرۆكێ حكومەتا هەرێما كوردستانێ كاروانێ ئاڤەدانیێ دێ یێ بەردەوامبیت و گۆت: «ئەم ژ ئەڤرۆ وێڤە وەكو پارێزگەها دهۆكێ دێ پتر گرنگیێ ب جوانكرن و رێكخستن و پێشئێخستنا باژێرێن مەزن یێن پارێزگەهێ دەین و پتر بەرچاڤكەین، نەخاسمە ژ روویێ گەشتوگوزاری ڤە».
هەژی گوتنێ یە قێركرنا جاددەیێن ناڤخوەیی ل سەنتەرێ دهۆكێ ل سەر بودجا پارێزگەهێ و ب گوژمێ سێ ملیار و 622 ملیۆن دیناران و ب درێژاهیا سێ هزار و 940 متران، ب قەبارێ 70 هزار مترێن دوجاركی دێ هێنە چێكرن.
دیسا هەر ل رۆژا 14/10/2024 د. عەلی تەتەر، پارێزگارێ دهۆكێ ب ئامادەبوونا خەلیل مەحمود، دەڤەردارێ سێمێلێ و چەندین رێڤەبەریێن پەیوەندیدار ل جهێن جودا بەرێ بنیاتی بۆ 24 پڕۆژەیێن خزمەتگوزاری ب گوژمێ پتری نەه ملیار دیناران دانا.
پارێزگارێ دهۆكێ د كۆنگرەكێ رۆژنامەڤانی دا گۆت: «ل رۆژێن بهێن پڕۆژەیێن خزمەتگوزاری د ناڤ سەنتەرێ سێمێلێ دا و ناوچەداری و كۆمەلگەه و گوندێن دەڤەرداریا سێمێلێ پتر دێ هێنە بجهئینان، نەخاسمە د بیاڤێ رێكخستن و جوانكرنا باژێرێ سێمێلێ دا.
دیسا هەر ل رۆژا 14/10/2024 د. عەلی تەتەر، پارێزگارێ دهۆكێ هەڤدیتنەك ل گەل ناسح مەلا محەمەد ئوسمان، رێڤەبەرێ گشتی یێ ئەوقافا پارێزگەها دهۆكێ و رێڤەرێن ئەوقافا دەڤەرداریێن دهۆك و سێمێلێ و مامۆستایێن هەژمارەكا مزگەفتان ل سنوورێ دهۆك و سێمێلێ ئەنجام دا و د هەڤدیتنەكێ دا بەحسێ رۆلێ مامۆستایێن ئایینی د ناڤ جڤاكی دا و گەهاندنا پەیاما پێكڤەژیانا ئولی و نەتەوەیی و سەروبەرێ مزگەفتان و ئەو كار و خزمەتا حكومەتا هەرێما كوردستانێ ب رێكا فەرمانگەهێن ئەوقافێ پێشكێش دكەت هاتە كرن.
پارێزگارێ دهۆكێ دیار كر، خێرخواز زكری بارزانی خودانێ كومپانیا كاڤین گروپ ب هەڤكاری ل گەل پارێزگەها دهۆكێ بەرهەڤیا خۆ دیاركریە ژ بۆ قێركرنا گورپان و رێكێن (11) مزگەفتێن مەزن ل سنوورێ دەڤەرداریێن دهۆك و سێمێلێ.
دیسا ل رۆژا 13/10/2024 بەرێ بنیاتی بۆ چێكرنا جاددەیا 60 متری ژ دوڕیانا حەوشكێ هەتا گوندێ سێجێ ل دەڤەرداریا سێمێلێ ب درێژاهیا پتری سێ كیلۆمێتران و ب گوژمێ 13 ملیار و 227 ملیۆن دیناران هاتە دانان.
