16ی ئۆكتۆبەرێ خالەكا ڕەشە ب ناڤ چاڤێن ئەنجامدەرێن وێڤە
مەكتەبا رێكخستنا پارتی ل پارێزگەها دهۆكێ دوهی ب هەلكەفتا خیانەتا 16ی ئوكتۆبەرێ پەیامەك بەلاڤكر و تێدا هاتیە: «16ی ئوكتۆبەرێ مەزنترین خیانەت بوو د راستا گەلێ كوردستانێ و دیرۆك و قوربانی و زحمەت و ماندیبوونا چەندین سالێن گەلێ كوردستانێ دا هـاتیە كرن، ئەنجامدەرێن وێ كەركووك رادەستی هێزێن حەشدا شەعبی و نەیارێن گەلێ كوردستانێ كر، خیانەتەكە هیچ كوردەكێ ب شەرەف و نیشتیمان پەروەر هەتا هزار سالێن دیتر ژی ژ بیر ناكەت».
مەكتەبا رێكخستنێ د پەیاما خۆ دا ئاشكرا كریە، ئەڤ هێرشە ب تنێ بۆ كەركووكێ نەبوو، بەلكو بۆ داگیركرنا هەمی كوردستانێ بوو، پیلانا وان ئەنفالەكا دیتربوو ب سەر گەلێ كوردستانێ دا بینن، بەلێ پێشمەرگەهـێن قەهرەمانێن پارتی و بارزانی بەرسینگێ دوژمن و نەحەز و نەیارا گرت و وانەیەكا وەسا دایێ، كو هەتا هەتا ژبیرا وان نەچیت و كوردستان هاتە پاراستن».
د پەیاما مەكتەبا رێكخستنێ دا هاتیە: «یا ڤەشارتی نینە زۆربەیا هەرە زۆرا سەرانێت ئێكەتیێ دانپێدانێ ب ڤێ خیانەتێ دكەن وناڤەشێرن».
دیسا د پەیامێ دا هاتیە: «نەمری و سەربلندی بۆ وان شەهـیدێن بەرسینگێ خیانەتا 16ی ئوكتۆبەرێ گرتی، سلاڤ بۆ وان پێشمەرگەهێن قەهرەمان، كو ژ لوولیا تڤەنگا وان مزگینیا ئازادیێ و سەرفەرازیێ باری، سلاڤ بۆ جەماوەرێ خۆڕاگرێ كوردستانێ، دیروكێ سەلماند كییە كەركوكێ و كوردستانێ دپارێزیت و كییە كەركوكێ و كوردستانێ دفرۆشیت، بەلێ پارتی پارێزەرا كورد و كوردستانێ یە و دێ مینیت ئومێدا هەرە مەزنا گەلێ كوردستانێ بۆ سەركەفتنا ئێكجاری».
