پارێزگارێ دهۆكێ بەرێ بنیاتی بۆ 78 پڕۆژەیان ل سنوورێ دەڤەرداریێن دهۆكێ و ئامێدیێ دانا
ئامێدیێ، مەحمود نهێلی:
بەردەوامیدان ب گەهاندنا پڕۆژەیێن خزمەتگوزاری، دوهی سپێدێ 16/10/2024 د. عەلی تەتەر، پارێزگارێ دهۆكێ جودا جودا سەرا دەڤەرداریێن دهۆكێ و ئامێدیێ و ناوچەداریێن زاویتە و چەمانكێ و سەرسنكێ و كۆمەلگەها باگێرا و ناوچەداریا مانگێشكێ دا و بەرێ بنیاتی بۆ 78 پڕۆژەیێن جوراوجور، وەكو: رێك و ئاڤ و كارەب و پڕۆژەیێن پەروەردێ و وەرزشی و كارەبێ و…هتد ب گوژمێ 18 ملیار و 356 ملیۆن دیناران دانا.
پارێزگارێ دهۆكێ د كۆنگرەكێ رۆژنامەڤانی دا گۆت: «ل دووڤ راسپاردێن سەرۆكێ حكومەتا هەرێما كوردستانێ كاروانێ ئاڤەدانیێ دێ یێ بەردەوامبیت و پڕۆژەیێن خزمەتگوزاری ب یەكسانی دێ گەهنە هەموو دەڤەران و دڤێت هەموو پڕۆژە ل دووڤ پیڤەرێن ئەندازیاری بهێنە چێكرن و بكەڤنە د خزمەتا وەلاتیان دا».
پارێزگارێ دهۆكێ ل دەڤەرا ئامێدیێ بەرێ بنیاتی بۆ 38 پـڕۆژەیان ب گوژمێ هەشت ملیار و 157 ملیۆن دیناران ل سەنتەرێ دەڤەرداریێ و سنوورێ ناوچەداریێن چەمانكێ و سەرسنكێ دانا.
دیسا پارێزگاری ل سنوورێ دەڤەرداریا دهۆكێ ژی بەرێ بنیاتی بۆ 39 پڕۆژەیان ل ناوچەداریێن زاویتە و مانگێشكێ و كۆمەلگەها باگێرا ب گوژمێ پتری 10 ملیار دیناران دانا.
