پرۆسێسا دەنگدانێ ل سنوورێ پارێزگەها دهۆكێ ب سەركەفتیانە هاتە ئەنجامدان
پرۆسێسا دەنگدانێ بۆ خولا شەشێ یا پەڕلەمانێ كوردستانێ دوهی 20/10/2024 هاتە ئەنجامدان، ل دەمژمێر 7:00 سپێدێ دەرگەهێن بنگەهێن دەنگدانا گشتی ل هەمبەر دەنگدەران ل سنوورێ پارێزگەها دهۆكێ ژی هاتنە ڤەكرن و دەنگدەران قەستا بنەگەهێن دەنگدانێ كر و ب رەنگەكێ بەرفرەه پشكداری د ڤێ پرۆسێسا دیموكراسی دا كر، بۆ هەلبژارتنا نوونەرێن خوە بۆ خۆلا شەشێ یا پەڕلەمانێ كوردستانێ، دیسا ل رۆژا 18/10/2024 ژی دەنگدانا تایبەت هاتە كرن.
سەر بەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ، كو د دەنگدانا تایبەت دا دەنگێ خوە دا، پشتی دەنگدانێ د كۆنگرەكێ رۆژنامەڤانی دا دیار كر، پرۆسە ب رەنگەكێ باش و سەركەفتیا ب رێڤە دچیت و گۆت: «دەنگدان هەم مافە و هەم ئەركە، لەو داخوازێ ژ هەمی وەلاتیان دكەین پشكداریێ د ڤێ پرۆسێسێ دا بكەن و جارەكا دی پاشەرۆژا كوردستانێ بكەنە د دەستەكێ ئەمین دا».
دیسا دوهی 20/10/2024 د. عەلی تەتەر، پارێزگارێ دهۆكێ ل بنگەهێ ڕاپەرین ل تاخێ مالتا خوارێ پشكداری د پرۆسێسا هەلبژارتنێن پەرلەمانێ كوردستانێ دا كر و دەنگێ خوە دا و داخواز ژ وەلاتییان ژی كر ب بەرفرەهی پشكداریێ د پرۆسێسا دەنگدانێ دا بكەن.
پشتی پارێزگاری دەنگێ خوە دای د كۆنگرەكێ رۆژنامەڤانی دا گۆت: «پشكداریكرن د هەلبژارتنان دا ئەركەكێ نیشتمانی و نەتەوەیی یە، هیڤیدارین ئەڤ پرۆسێسە ب ئازادی و ب شێوەكێ ئارام و تەنا بهێتە ئەنجامدان و پارێزگەها دهۆكێ وەكو هەرجار ل پێشیێ و یا ئێكێ بیت».
دیسا هەر دوهی و ب مەرەما دووڤچوونا پرۆسێسا هەلبژارتنێن پەرلەمانێ كوردستانێ د. عەلی تەتەر، پارێزگارێ دهۆكێ و ب ئامادەبوونا خالد عەباس، رێڤەبەرێ ئوفیسا دهۆكێ یا كومسیۆنا هەلبژارتنان ل ئیراقێ جودا جودا سەرەدانا هەردو بنگەهێن ئامادەیێن دهۆك و شالین یێن كچان ل سەنتەرێ دهۆكێ دا و ژ نێزیك سەحكرە چاوانیا ب رێڤەچونا ڤێ پرۆسێسا دیموكراتی.
ژ لایەكێ دیڤە ئەلینا ڕۆمانۆوسكی، بالیۆزا ئەمریكا ل ئیراقێ د پەیامەكێ دا ڕاگەهاند، پشتەڤانییێ ل هەمی بزاڤان دكەین بۆ هندێ هەلبژارتنێن پەرلەمانێ هەرێما كوردستانێ ب ئازاد و دادپەروەرانە بهێنە ئەنجامدان و گۆت: «داخوازێ ژ هەمی لایەنێن سیاسی و هێزێن ئێمناهییێ دكەین ڕێزێ ل ڕۆلێ گرنگ یێ میدیایی و جڤاكێ مەدەنی بگرن د پرۆسەیا دیموكراسی دا و خوە ژ توندوتیژییێ بپارێزن».
هەژی گوتنێ یە ل سنوورێ پارێزگەها دهۆكێ 682 هزار و 791 كەسان مافێ دەنگدانێ هەبوو، 264 بنگەه و هزار و 596 وەستگەه هاتبوونە دەستنیشانكرن بۆ ئەنجامدان ڤێ پرۆسێسا دیموكراتی.
ل بازنەیێ پارێزگەها دهۆكێ 226 بەربژاران هەبوون، ژ وانا 160 زەلام بوون، 66 ژی ژن بوون و هەڤڕكی ل سەر 24 كورسیان كر و كورسییەك ژی یا كوتابوو.