ئۆجەلانی داخواز ژ سەرکردەیێن پەکەکێ کریە دەست ژ چەکی بەردەن
رۆژنامەکا ناڤدار یا تورکیا دیار دکەت، سەرۆکێ زیندانکری یێ پەکەکێ ل گەل سەرکردێن پەکەکێ یێن ل قەندیلی ئاخڤیە و داخواز ژ وان کریە کو دەست ژ چەکی بەردەن، چونکی نها سەردەمێ دانوستاندنانە و دڤێت شەڕ بهێتە راگرتن.
عەمبەرین زەمان رۆژنامەڤانا ناڤدار یا تورکیا بۆ رۆژناما ئەلمۆنیتۆر راگەهاند کەسەکی نێزیکی سەرۆک کۆمارێ تورکیا کو د هەمان دەمی دا بەرپرسیارە ژ دۆسیا کورد ل تورکیا دیار کریە، بەرپرسێن دەولەتێ رێ داینە سەرۆکێ زیندانکری یێ پەکەکێ کو ل گەل سەرکردێن وێ پارتێ ل قەندیلی بئاخڤیت و د چەند رۆژێن بۆری دا ئۆجەلان ل گەل وان ئاخڤیە و بۆ وان دیار کریە، دڤێت ئێدی ئەو دەست ژ چەکی بەردەن و دەست ب دانوستاندنان بکەن، چونکی سەردەمێ شەڕێ چەکداری ب دووماهی هاتیە و دڤێت پرسێن هەی ب رێیا دانوستاندنان بهێنە چارەسەرکرن.
هەمان رۆژنامەڤانێ ئەو یەک ژی دیار کریە، هەتا نها ناڤەرۆکا پەیوەندیا ئۆجەلانی ل گەل سەرکردێن پەکەکێ یێن ل قەندیلی ب تەمامی نەهاتیە ئاشکرا کرن لێ د پەیوەندیەکا تەلەفۆنی دا ناکۆکی د ناڤبەر ئۆجەلانی و سەرکردێن پەکەکێ دا هەبووینە، لێ بەرفرەهیا بابەتی هێشتا ب تەمامی نەهاتیە زانین.
عەمبەرین زەمان ئەو یەک ژی دیار کریە، پشتی هەلوەستێ سەرۆکێ پارتا نەتەوەپەرست یا تورکیا، نها بەحسێ دەستپێکرنا قۆناغەکا نوو ل تورکیا دهێتە کرن، لێ دەولەتێ دڤێت ڤێجارێ بابەت ب رەنگەکێ دی برێڤە بچیت، هندەک کەسێن نێزیکی ئەردۆغانی وەسا دبینن ب رێیا گوهۆڕینا هندەک ماددەیێن دستووری دێ رێ بۆ چارەسەریا سیاسی ل تورکیا خوەش بیت، لێ دڤێت بەری وێ پەکەکە ب فەرمی دەست ژ چەکی بەردەت، ژ بەر ڤێ یەکێ ژی داخواز ژ ئۆجەلانی هاتیە کرن سەرکردێن پەکەکێ نەچار بکەت دەست ژ چەکی بەردەن.
ئەو یەک د دەمەکێ دایە کو حەفتیا بۆری موراد قەرەیلان ئێک ژ سەرکردێن پەکەکێ ژی دیار کربوو جارێ چو تشتەک ب ناڤێ قۆناغا ئاشتیێ ل گەل تورکیا نینە، بەلکو ئۆپەراسیۆنێن دەولەتا تورکیا ل دژی وان د بەردەوامن و هەتا دەولەتا تورکیا شەڕی ل دژی کوردان نەدەتە راگرتن و دۆرپێچا ل سەر ئۆجەلانی ژی نەهێتە راکرن ئەو چو دانوستاندنان ل گەل دەولەتا تورکیا ناکەن.
چاڤدێرێن سیاسی ل تورکیا و باکورێ کوردستانێ ژی وەسا دبینن، نها ئەردۆغانی دڤێت دەست ب قۆناغەکا نوو یا ئاشتیێ و چارەسەریا سیاسی ل تورکیا بکەت و ژ بۆ ڤێ یەکێ ژی رێ ب ئۆجەلانی هاتیە دان ب رۆلێ خوە رابیت، لێ نها رەوش وەکو چەندین سالێن بۆری نینە، چونکی باوەریا سەرکردێن پەکەکێ ب سۆزێن دەولەتا تورکیا ناهێت و ئەو وەسا دبینن ئۆجەلان ل زیندانی دایە و ئازاد نینە و ل ژێر فشارا دەولەتا تورکیا دایە.
