دەست ب دروستكرنا 20 هزار یەكەیێن ئاكنجیبوونێ هاتیە كرن
سەرۆكێ دەستەیا وەبەرهێنانا هەرێما كوردستانێ ئاشكرا كر، ب بڕیارا سەرۆكوەزیران مەسرور بارزانی، دەست ب دروستكرنا 20 هزار یەكەیێن ئاكنجیبوونێ هاتیە كرن.
محەمەد شوكری، سەرۆكێ دەستەیا وەبەرهێنانا هەرێما كوردستانێ دیار ژی كر، دروستكرنا نێزیكی 10 هزار شوققەیێن دی ژی پێدڤی ب خەرجییێ هەیە و دێ دەست پێ هێتەكرن، دو باژێڕ بۆ كرێداران ل عەنكاوە و گەرمیان دێ هێنە دروستكرن و ل هەولێرێ ژی دو جهـ بۆ دروستكرنا یەكەیێن ئاكنجیبوونێ بۆ كێم دەرامەت و كرێداران هاتیە دابینكرن.
ناڤهاتی گۆت: «ل سلێمانیێ و دهۆكێ و زاخۆ و هەلەبجە و چەندین دەڤەرێن دی ژی، پڕۆژەیێن دروستكرنا یەكەیێن ئاكنجیبوونێ ب خزمەتگوزاری و كوالیتییا بلند دێ هێنە ئەنجامدان، سەرۆكوەزیران مەسرور بارزانی بڕیار ل سەر وان پڕۆژەیان دایە، مە دڤێت بارێ سەر ملێن خەلكی سڤك بكەین».
ل دووڤ زانیاریان 120 هزار فۆرم بۆ وەرگرتنا یەكەیێن ئاكنجیبوونێ هاتینە پڕكرن، ئەڤە ژی بیرئینانە، كو هەردەم سەرۆكوەزیران مەسرور بارزانی دووپات دكەت، هەمی كێم دەرامەت و كرێدار ژ پڕۆژەیێن وەبەرهێنانێ مفادار بن، ئەوێن وان یەكەیان دكڕن بێ بەهر نابن ژ وەرگرتنا پارچەیێن ئەردی ژ حكومەتێ.
