شەڕێ پەكەكێ و توركیا ل ئامێدیێ پتر نێزیكی سەنتەرێ باژێڕ و گوندان دبیت
ئامێدیێ، مەحمود نهێلی:
رۆژ ل دووڤ ڕۆژێ شەڕێ پەكەكێ و توركیا ل دەڤەرا ئامێدیێ دژوارتر لێ دهێت و دەم بۆ دەمی پتر نێزیكی سەنتەرێ باژێڕ و گوندان دبیت و زیانێن زێدەتر یێن ماددی دگەهنە وەلاتیان و جهێن خزمەتگوزاری و هێلێن ئنترنێتێ.
پشتی گەهشتنا هێزێن سەربازی یێن توركیا بۆ دەڤەرێ، ل دەوروبەرێن باژێرێ ئامێدیێ و دێرەلۆكێ جار بۆ جار شەڕ د ناڤبەرا گەریلایێن پەكەكێ و لەشكرێ توركیا دا دروست دبیت و هندەك جاران گوندێن دەوروبەرێن سەنتەرێ باژێڕان دبنە ئارمانجا هێرشێن هەردو لایان و د ئەنجام دا زیانێن زۆر دگەهنە وەلاتیان و جهێن خزمەتگوزاری.
ئەحمەد گوهەرزی، هەلبژێرێ گوندێ گوهەرز بۆ رۆژناما ئەڤرۆ دیار كر، د ڤان دو رۆژێن دەربازبووی دا پتر ژ دەهـ گوللە تۆپ ل دەوروبەرێن گوندێ وان كەفتینە، ژ وان ئێك ب ناڤ گوندی بخوە كەفتینە و د ئەنجام دا زیان گەهشتیە پتری 40 مال و ترۆمبێلان و ترس و دو دلی ئێخستیە د دلێ ئاكنجیێن گوندی دا.
ناڤهاتی دیار ژی كر، بەری شەڤەكێ ژی تۆپەك ب مالا وەلاتیەكی كەفت و د ئەنجام دا ژ بلی زیانێن ماددی، ئەندامێن خێزانا وێ مالی تووشی بێهۆشیێ بوون و هاتنە رەوانەكرن بۆ نەخۆشخانێ.
ژ لایەكێ دیڤە و ژ ئەنجامێ دانانا بومبێن تی ئێن تی كری ل سەر رێیێن گشتی زیان ب هێلێن ئنترنێتێ و ترۆمبێلێن وەلاتیان گەهشتینە.
ل دەڤەرا بەرێ گارێ و زێبارێ ژی و ژ ئەنجامێ تۆپبارانكرنا توركیا ئاگر بەربوویە ئاقار و خانیێن وەلاتیان، د ئەنجام دا ب هزارەهان دۆنەمێن دارستانێ و ئاقارێ گوندیان و خانیێن وەلاتیان هاتینە سۆتن.
ژ لایەكێ دیڤە ژی توركیا هندەك خالێن نوو ل چیایێ مەتینا ل هنداڤی گوندێن رەشاڤە و گوندێن بلاڤە و گوهەرز و سەرگەلێ و سگێرێ داناینە و شەڕ و پەڤچوون ل وێ دەڤەرێ ژی د بەردەوامن.
