تورکیا ئێدی نەچارە پرسا کوردی چارەسەر بکەت
پەرلەمانتارەکێ پارتا کۆماریا گەل دیار کر، پێشهاتێن نها ل تورکیا سەبارەت ب پرسا کوردی گەلەک ئەرێنی نە، هەلوەستێ سەرۆکێ پارتا بزاڤا نەتەوەپەرست ژی گەلەک گرنگە، ئێدی دەم یێ هاتی تورکیا پرسا کوردی چارەسەر بکەت، چونکی بەردەوامیا ئالۆزیێن نها دێ کاریگەریا خوە یا گەلەک خراب بۆ تورکیا هەبیت.
سەزگین تانریکولو ئەندامێ پەرلەمانێ تورکیا سەر ب فراکسیۆنا پارتا کۆماریا گەل بۆ مالپەرێ ئارتی گەرچەک یێ تورکیا دیار کر، نها پێشهاتێن گەلەک گرنگ و دیرۆکی ل تورکیا روو ددەن، هەلوەستێ دەولەت باخچەلی سەرۆکێ پارتا بزاڤا نەتەوەپەرست ژی گەلەک گرنگ و دیرۆکی یە، چونکی ئەم دزانین ب سالانە دەولەت باخچەلی ل دژی چارەسەرکرنا پرسا کوردی ل تورکیا بوو، لێ نها وی دڤێت پرسا کوردی بهێتە چارەسەرکرن و گۆت: (دیارە هندەک هەڤدیتن د ناڤبەرا هەر دو ئالیان دا هەنە، هەرچەندە هەتا نها دەولەتێ چو تشت بۆ رایا گشتی ئاشکرا نەکرینە، لێ ژ ئاخڤتن و هەلوەستێ هەر دو ئالیان دیار دبیت پێشهاتێن باش و ئەرێنی هەنە).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، ب سالانە ژ بەر پرسا کوردی رەوشا ناڤخوەیی یا تورکیا ژی ئالۆزە، نها تورکیا د قەیرانەکا گەلەک مەزن یا ئابووری دایە، سالانە پارەکێ گەلەک مەزن بۆ شەڕی دهێتە تەرخان کرن، هەکە شەڕێ نها ل تورکیا ب دووماهی بهێت و پرۆسیسا ئاشتیێ ژی سەر بگریت، بێگومان دێ تورکیا رۆژ ب رۆژێ بهێزتر لێ هێت، ئەز باوەر ناکەم نها ل تورکیا چو کەسەک ل دژی چارەسەرکرنا پرسا کوردی بیت، لێ دڤێت ناڤەرۆکا پرۆژێ دەولەتێ بۆ رایا گشتی یا تورکیا بهێتە ئاشکرا کرن، چونکی هەتا نها ژی ئەم نزانین کا دانوستاندن گەهشتینە کیڤە و هەروەسا گەلەک گرنگە بهێتە ئاشکرا کرن کا دەولەتێ دڤێت چاوا پرسا کوردی چارەسەر بکەت.
سەزگین تانریکولو ئەو یەک ژی دیار کر، پێدڤیا تورکیا ب ئاشتیێ هەیە، دڤێت هەموو هێزێن سیاسی خوە ژ زمانێ توند دوور بکەن، دڤێت ئەم رێزێ ل هەڤدو بگرین، دڤێت رێزێ ل کوردان و هەموو نەتەوەیێن دی یێن تورکیا بگرین، ژ بۆ ئاشتیێ و چارەسەرکرنا پرسا کوردی ژی بێگومان گەلەک یا گرنگە هێزێن سیاسی، رێکخستنێن جڤاکێ سڤیل، هونەرمەند و هەموو وەلاتیێن تورکیا د هاریکاری بن، چونکی نها دەلیڤەکا گەلەک گرنگ و دیرۆکی هاتیە پێش، دڤێت ئەم نەهێلین جارەکا دی هندەک هێزێن توندرەو ئاستەنگان ل هەمبەر قۆناغا ئاشتیێ دروست بکەن، چونکی هەر کەس دزانیت ئێدی دەم یێ هاتی پرسا کوردی ل تورکیا بهێتە چارەسەرکرن و گۆت: (تورکیا نەچارە پرسا کوردی چارەسەر بکەت، هەلوەستێ پارتێن سیاسی ژی گەلەک باشن و دڤێت ئەم پێکڤە ب چارەسەرکرنا پرسا کوردی، تورکیا ژ رەوشا نها یا قەیراناوی قورتال بکەین).
