داخوازیێن دەستهەلاتێ و کوردان ل دۆر قۆناغا ئاشتیێ گەلەک ژێک دوورن
ڤەکۆلەرەکێ ناڤدار یێ تورکیا دیار دکەت، دەستهەلاتا نها یا تورکیا دڤێت ب رێیا قۆناغا ئاشتیێ کاریگەریا کوردان ل سەر گوهۆڕینێن نها ل دەڤەرێ کێم بکەت یان ژی نەهێلیت و ئارمانجا ئەردۆغانی ئەوە پەکەکێ و رۆژئاڤایێ کوردستانێ لاواز بکەت و ئەو یەک ژی دێ قۆناغا ئاشتیێ تووشی ئاستەنگێن گەلەک مەزن کەت.
فەهیم تاشتەکین نڤیسەر و ڤەکۆلەرێ ناڤدار یێ تورکیا کو ب سالانە ل سەر پرسا کوردی کار دکەت د دووماهی نڤیسا خوە یا ل رۆژناما دوڤار یا تورکیا دا دیار کریە، ئارمانجا دەولەت باخچەلی و ئەردۆغانی ئەوە کو ب رێیا عەبدوللا ئۆجەلان و دەم پارتیێ دەست ب قۆناغەکا نوو بکەن، لێ د هەمان دەمی دا وان دڤێت پەکەکێ و رۆژئاڤایێ کوردستانێ ل دەرڤەیی ڤێ قۆناغێ بهێلن و ئارمانجا سەرەکی یا دەولەتا تورکیا ژی لاوازکرنا کوردانە و گۆت: (رۆژهەلاتا ناڤین بەر ب گوهۆڕینێن مەزن ڤە دچیت، مەترسیەکا گەلەک مەزن ل سەر تورکیا هەیە، بەرپرسێن تورکیا هەر رۆژ بەحسێ مەترسیا نوو ژی دکەن، ئەو دزانن نها هەر گوهۆڕینەک ل دەڤەرێ روو بدەت دێ بیتە ئەگەر کورد ژی داخوازا مافێن خوە بکەن، تورکیا دترسیت هەر گوهۆڕینەک ببیتە ئەگەرێ بهێزبوونا کوردان و ژ بەر ڤێ یەکێ ژی وان دڤێت ب رێیا دەم پارتیێ و ئۆجەلانی دەست ب پیلانەکا نوو ل دژی کوردان بکەن).
ناڤهاتی ئەو یەک ژی دیار کر، تشتێ نها دیارە ئەوە ئارمانجا ئەردۆغانی و دەولەت باخچەلی چارەسەرکرنا پرسا کوردی نینە، بەلکو ئارمانجا وان بهێزکرنا تورکیا یە، وان دڤێت ب رێیا قۆناغا ئاشتیێ کوردان دیسان بێ ماف بهێلن، چو بەرنامێن ئەردۆغانی و دەستهەلاتێ بۆ چارەسەرکرنا پرسا کوردی نینن، ئەو یەک ژی بوویە جهێ گۆمانێ، هەرچەندە کوردان پێ باشە جارەکا دی قۆناغەکا نوو دەستپێ بکەت، لێ زانیاریێن ل بەر دەست نیشا ددەت تشتێ دەولەتێ دڤێت و تشتێ کوردان دڤێت گەلەک ژێک دوورن و ژ بەر ڤێ یەکێ ژی گەلەک ب زەحمەتە تورکیا بشێت کوردان رازی بکەت، چونکی بەرپرسێن پەکەکێ یێن ل قەندیلی ژی گەلەک ب گومانن و دزانن دەولەتێ دڤێت ئۆجەلانی و دەم پارتیێ ل دژی وان بکار بینیت.
فەهیم تاشتەکین ئاماژە ب ڤێ یەکێ ژی کریە، کو بەرپرسێن دەم پارتیێ داخواز ژ دەستهەلاتێ کرینە کو بەرنامێ خوە یێ بۆ ئاشتیێ ئاشکرا بکەت، چونکی هەتا نها ژی بۆ کوردان دیار نینە کا مەرەما دەستهەلاتێ ژ دەستپێکرنا قۆناغەکا نوو چیە، لێ تشتێ هەتا نها دیار دبیت ئەوە کو ئەردۆغان و باخچەلی دخوازن کوردان مژوول بکەن دا نەهێلن کورد ژ گوهۆڕینێن ل رۆژهەلاتا ناڤین مفادار بن، ژ بەر ڤێ یەکێ ژی چو تێگەهشتنەک د ناڤبەرا دەستهەلاتێ و کوردان دا ل دۆر قۆناغەکا نوو یا ئاشتیێ نینە.
