دەمێ وەرگرتنا پارەیێ حەجیان هاتـە درێژكـرن
زنار تۆڤی:
پەیڤدارێ رێڤەبەرییا گشتییا حەج و عومرێ ل هەرێما كوردستانێ دیار كر، وەرگرتنا گوژمێ ئێكێ یێ پارەیێ حەجیان هەتا رۆژا سێشەمبییا بهێت 12/11/2024ێ، هاتە درێژكرن.
كاروان ستوونی بۆ رۆژناما ئەڤرۆ خویا كر، ئەوێن ناڤێن وان بۆ چوونا حەجێ ل سالا 2025 دەركەفتین و ژ بۆ بەرژەوەندییا گشتی، وەرگرتنا گوژمێ ئێكێ یێ پارەیێن حەجیان هەتا رۆژا سێشەمبییا بهێت 12/11/2024ێ» هاتییە درێژ كرن و گۆت: «هەر كەسێ گیرۆ ببیت و هەتا ڤی دەمی پارەی نەئینیت، مافێ حەجكرنێ نامینیت و ل جهێ وی دێ ناڤەكێ یەدەك ل دووڤ رێزبەندییا دەرچوونا ناڤان جهێ وی گریت».
ناڤهاتی گۆتژی: «ئەم داخوازێ ژ وان وەلاتییان دكەین، یێن ئەڤ سالە ناڤێن وان دەركەفتین، زوو سەرەدانا نڤێسینگەهێن حەج و عومرەیا هەرێما كوردستانێ ل پارێزگەهێن، هەولێر، دهۆك، سلێمانی و هەلەبجە و ئیدارێن سەربەخۆ یێن، زاخۆ، سۆران، ڕاپەرین و گەرمیان، بكەن، ب مەرەما تەمامكرنا مامەلەیێن خۆ، چونكی دەمێ وەرگرتنا گوژمێ ئێكێ یێ تێچوویا حەجێ ب چ رەنگان ناهێتە درێژكرن ڤە، هەروەسا دڤێت چار ملیۆن دینارێن ئیراقی، وەكو گوژمێ ئێكێ و ئەو كەسێ ناڤێ وی دەركەفتی بەرهەڤ ببیت و پاسپۆرتا خۆ ژی ل گەل خۆ بینیت».
