مـە دڤێت دوومـاهیێ ب ئێش و ئازارێن سـەد سـالێن بۆری بینین
سەرۆکێ پارتا بزاڤا نەتەوەپەرست یا تورکیا جارەکا دی دیار کر ئەو یێ رژدە شەرێ نها ل تورکیا ب دووماهی بهێت، دڤێت پەکەکە دەست ژ چەکی بەردەت و دەرگەهێ سیاسەتێ ڤەکریە، چونکی وان دڤێت ئێش و ئازارێن سەد سالێن بۆری نەمینن و پێدڤیا تورکیا ب ئاشتیێ و ئارامیێ هەیە.
دەولەت باخچەلی سەرۆکێ پارتا بزاڤا نەتەوەپەرست یا تورکیا دوهی د کۆمبوونا پارتا خوە دا ئاخڤی و دیار کر، تشتێ من بەری نها گۆتی ئەز دیسان دوبارە دکەم، دڤێت پەکەکە دەست ژ چەکی بەردەت، بلا ئۆجەلان بهێتە پەرلەمانێ تورکیا و هەلوەشاندنا پەکەکێ ب فەرمی راگەهینیت، وی دەمی دێ دەرگەهێ سیاسەتێ ڤەبیت، هەتا چەک و توندوتیژی هەبیت کەس نەشێت بەحسێ ئاشتیێ و ئارامیێ بکەت، بلا ڤێ دەلیڤێ ژ دەست نەدەن و گۆت: (ئەم دزانین سەد سالێن بۆری ل تورکیا پر ژ ئێش و ئازار بوون، مە دڤێت ئێش و ئازارێن سەد سالێن بۆری نەمینن، مە دڤێت دەست ب قۆناغەکا نوو بکەین، ژ بۆ ڤێ یەکێ ژی گرنگە ڤێ دەلیڤا نها هاتیە پێش ژ دەست نەدەن).
سەرۆکێ پارتا بزاڤا نەتەوەپەرست یا تورکیا ئەو یەک ژی دیار کر، دەولەتا تورکیا یا هەموو وەلاتیێن تورکیا یە، هەکە ئاریشەیەک ژی هەبیت دڤێت ب رێیا دانوستاندنان بهێتە چارەسەرکرن، ب چەکی و توندوتیژیێ چو پرسەک ناهێتە چارەسەرکرن، ژ بەر ڤێ یەکێ دڤێت ئەم هەموو پێکڤە کار بکەین و وەلاتێ خوە بهێز بکەین و رێ نەدەین هندەک هێزێن بیانی هندەک تشتان بکەنە بەهانە و کار بۆ لاوازیا تورکیا بکەن.
ل ئالیێ دی محەمەد مەتینەر ئەندامێ بەرێ یێ پەرلەمانێ تورکیا سەر ب ئاکپارتیێ ژی دیار کر، دڤێت پەکەکە و ئۆجەلان بەرسڤا داخوازیێن باخچەلی بدەن، براستی ژی ئەو یەک دەلیڤەکا گەلەک گرنگە، هەکە ئاپۆ ب فەرمی داخواز ژ پەکەکێ بکەت دەست ژ چەکی بەردەت وی دەمی کەسێن وەکو دەمیرتاش دشێن رۆلەکێ کاریگەر د قۆناغا نوو دا بگێرن، راستە پێدڤیا تورکیا ب ئاشتیێ و چارەسەرکرنا پرسا کوردی هەیە، لێ مخابن هەتا چەک د دەستێ پەکەکێ دا بن مرۆڤ نەشێت بەحسێ چارەسەرکرنا پرسا کوردی بکەت، دڤێت پەکەکە دەست ژ چەکی بەردەت دا وی دەمی زەمینە بۆ دانوستاندنان و چارەسەرکرنا پرسا کوردی یا گونجای بیت.
چاڤدێرێن سیاسی ل تورکیا و باکورێ کوردستانێ ژی وەسا دبینن پشتی ئەحمەد تورک و چەندین هەڤسەرۆکێن باژێرڤانیان ژ کاری هاتنە دوورخستن باوەریا کوردان ب سۆزێن دستهەلاتا نها نەمایە و وەلاتی وەسا دبینن چو نیەتا ئەردۆغانی بۆ چارەسەرکرنا پرسا کوردی نینە، بەلکو دەولەتا تورکیا دڤێت ل ژێر ناڤێ ئاشتیێ و چارەسەرکرنا پرسا کوردی نەهێلیت کورد ژ گوهۆڕینێن نها ل دەڤەرێ مفادار بن.
