هەلوەستێ ئاکپارتیێ ل دۆر چارەسەرکرنا پرسا کوردی د جهێ خوە دا نینە
سەرۆکێ پارتا کۆماریا گەل دیار دکەت پێدڤیە پرسا کوردی ل تورکیا بهێتە چارەسەرکرن و شەڕێ چەندین سالێن بۆری ژی ب دووماهی بهێت، لێ زمانێ پارتا دەستهەلاتێ د جهێ خوە دا نینە و گەلەک جاران داخۆیانیێن ئەردۆغانی و بەرپرسێن ئاکپارتیێ دبنە ئەگەرێ دلگرانیا کوردان.
ئۆزگور ئۆزەل سەرۆکێ گشتی یێ پارتا کۆماریا گەل د داخۆیانیەکێ دا بۆ دەزگەهێن راگەهاندنا تورکیا دیار کر، شاندێ ئیمرالیێ سەرەدانا وان کرن و هەڤدیتنەکا گەلەک باش هاتە کرن و وەکو پارتا کۆماریا گەل وان دیار کرینە کو دڤێت شەڕێ چەندین سالێن بۆری ل تورکیا ب دووماهی بهێت و قۆناغەکا نوو دەستپێکەت و گۆت: (راستە نها بەحسێ ئاشتیێ و چارەسەرکرنا پرسا کوردی ل تورکیا دهێتە کرن، لێ هەلوەستێ ئاکپارتیێ گەلەک جاران دبیتە ئەگەرێ ئالۆزیان، گەلەک جاران ئەردۆغان و بەرپرسێن دی یێن ئاکپارتیێ ب ئاخڤتنێن خوە یێن توند وەسا دکەن کورد دلگران بن، ئەو یەک گەلەک شاشە، چونکی هەکە هەوە ئاشتی دڤێت وی دەمی پێدڤیە زمانێ هەوە نەرم بیت، دڤێت هوون ب زمانێ خوە ژی وەسا نیشا بدەن کو براستی هەوە ئاشتی دڤێت، ژ بەر ڤێ یەکێ ژی پێدڤیە ئاکپارتی هەلوەستێ خوە بگوهۆڕیت، دڤێت زمانێ ئاکپارتیێ و هەلوەستێ وان د خزمەتا ئاشتیێ دا بیت).
ناڤهاتی ئەو یەک ژی دیار کر، دڤێت پرسا کوردی بهێتە چارەسەرکرن، پێدڤیا تورکیا ب ئاشتیێ و چارەسەرکرنا پرسا کوردی هەیە، ئەم باش دزانین هەتا پرسا کوردی ل تورکیا نەهێتە چارەسەرکرن دێ هەردەم ئالۆزی هەبن و گۆت: (نها د جڤاکێ تورکیا دا پشتەڤانیەکا گەلەک باش بۆ ئاشتیێ هەیە، کورد و تورک برانە، ب سالانە ئەم پێکڤە ل سەر ڤێ ئاخێ دژین، ئێدی دڤێت کورد ژی بگەهنە مافێن خوە، ژ بەر ڤێ یەکێ ژی وەکو پارتا کۆماریا گەل مە دڤێت پرسا کوردی ل پەرلەمانێ تورکیا بهێتە چارەسەرکرن).
سەرۆکێ گشتی یێ پارتا کۆماریا گەل د دووماهیا ئاخڤتنا خوە دا ئەو یەک ژی دیار کر، هەکە پرسا کوردی ل تورکیا بهێتە چارەسەرکرن دێ تورکیا بهێز کەڤیت، دێ گەلەک ئاستەنگیێن ل هەمبەر بهێزبوونا تورکیا ژ هۆلێ رابن، مە بەری نها ژی دیار کریە کو دڤێت وەکو کورد و تورک ئەم پرسێن هەی د ناڤبەرا خوە دا چارەسەر بکەین، نها زەمینەکا گەلەک باش هاتیە پێش و ئەم داخواز دکەین ڤێجارێ هندەک هێز ژ بۆ بەرژەوەندیێن خوە یێن تەنگ چو ئاستەنگیان ل هەمبەر قۆناغا ئاشتیێ و چارەسەرکرنا پرسا کوردی دروست نەکەن، چونکی دڤێت ئەم ڤێ راستیێ قەبوول بکەین ئەڤرۆکە نەبیت ژی سوباهی تورکیا نەچارە پرسا کوردی چارەسەر بکەت.
