زانایێن ئیرانی هۆشداریێ ددەنە مەسعود پزیشکیان
پشتی رێککەفتنا ئیرانێ و رۆسیا هژمارەک ژ زانایێن ناڤدار یێن ئیرانێ دیار کرن، رێککەفتنا نوو یا د ناڤبەرا ئیرانێ و رۆسیا دا دێ زیانەکا خوە یا گەلەک مەزن بۆ سەروەریا ئیرانێ هەبیت، ل گۆر رێککەفتنا نوو رۆسیا دشێت د گەلەک بیاڤان دا دەستێوەردانێ د کاروبارێن ناڤخوەیی یێن ئیرانێ دا بکەت، ئەو یەک ب چو رەنگەکێ ناهێتە قەبوولکرن و رێککەفتنا نوو یا ل گەل رۆسیا د رەوشا نها دا دێ زیانێن خوە گەلەک مەزن بۆ ئیرانێ هەبیت و دێ ئیران پتر ژ جاران ژ جیهانا پێشکەفتی دوور کەڤیت.
ل گۆر نێرینا زانایێن ئیرانێ، رۆسیا دزانیت ب هاتنا ترامپی ئیران دێ گەلەک تەنگاڤ بیت و ژ بەر ڤێ یەکێ ژی رۆسیا دڤێت پتر ئیرانێ بکەتە ژێر کۆنترۆلا خوە و رێککەفتنا کو بەری چەند رۆژان هاتیە ئیمزا کرن ژی ڤێ راستیێ باش نیشا ددەت، لێ دڤێت خەلکێ ئیرانێ رێ نەدەن هندەک کەس یاریێ ب چارەنڤیسێ وان بکەن.
