رێڤەبەریا خوەسەر داخوازەکا شامێ رەت دکەت
ل دووڤ راپۆرتەکا ئاژانسا رویترز دەستهەلاتا شامێ داخواز ژ رێڤەبەریا خوەسەر کریە گرتیێن داعشێ یێن نها ل دەستێ رێڤەبەریا خوەسەر و هێزێن سووریا دیموکرات دانە رادەستی وان بکەن یان ژی کۆنترۆلا زیندانێن کو چەکدارێن داعشێ تێدانە بدەنە وان، لێ ئەو یەک ژ ئالیێ رێڤەبەریا خوەسەر و هێزێن سووریا دیموکرات ڤە ب توندی هاتیە رەت کرن.
هەمان ئاژانسێ راگەهاندیە کو نها ل زیندانێن ل ژێر کۆنترۆلا هێزێن سووریا دیموکرات و رێڤەبەریا خوەسەر دا پتر ژ ١٠ هزار چەکدارێن داعشێ هەنە و هێزێن سووریا دیموکرات و هەڤپەیمانیا نێڤدەولەتی وان گرتیان دپارێزن و پڕانیا چەکدارێن داعشێ یێن ل زیندانان ژی ژ کارێن خوە پەشیمان نینن و هەکە بهێنە ئازاد کرن دێ جارەکا دی دەست ب کریارێن تیرۆرستی کەن.
چاڤدێرێن سیاسی دیار دکەن کو ئەمریکا و هەڤپەیمانیا نێڤدەولەتی یا شەڕێ ل داعشێ ب چو رەنگەکێ رێ نادەن تشتەک وەسا روو بدەت، چونکی ئەو یەک دێ بیتە ئەگەر جارەکا دی داعش دەست ب کریارێن تیرۆرستی ل سووریێ و گەلەک وەلاتێن دی بکەت.
