بەغدا د دروستكرنا سایلۆیان دا مافێ هەرێما كوردستانێ نادەت
زنار تۆڤی:
رێڤەبەرێ گشتییێ بازرگانی ل وەزارەتا بازڕگانی و پیشەسازییا هەرێما كوردستانێ دیار كر، حكومەتا ئیراقێ گرێبەستەك بۆ دروستكرنا پێنج سایلۆیان ئیمزاكریە، بەلێ هەرێما كوردستانێ بێبەهر كرییە و سایلۆیێن كەڤن ژی نووژەن ناكەت.
نەوزاد شێخ كامل بۆ رۆژناما ئەڤرۆ گۆت: «وەزارەتا بازڕگانییا ئیراقێ گرێبەستەك ل گەل كۆمپانیەكا سویسری و كۆمپانیەكا مسری ئیمزاكریە، بۆ دروستكرنا پێنج سایلۆیێن نوو ل ئیراقێ، لێ چ ژ وان ل هەرێما كوردستان ناهێنە دانان، هەر چەندە بەری نوكە مە داخواز ژ حكومەتا ئیراقێ كربوو، كو مە ژی بەهر د وان سایلۆیان دا هەبیت، بەلێ وان پلانا خۆ دانایە و چ سایلۆیێن نوو ل هەرێمێ چێناكەن».
گۆتژی: «ژبلی وان سایلۆیان، حكومەتا ئیراقێ یا بەرهەڤ نینە سایلۆیێن كەڤن ژی یێن ل هەرێمێ نووژەن بكەت، بەلی ب بڕیارا مەسرور بارزانی، سەرۆكی حكومەتا هەرێما كوردستانێ، گرنگی ب كەرتێ چاندنێ هاتییەدان و د كابینەیا نەهێ دا سێ سایلۆ ل هەرێمێ تەمام بووینە و سایلۆیا چارێ ژی ل هەلەبجە كار تێدا دهێتە كرن و بڕیارە ئەڤ سالە تەمام ببیت».
