تورکیا ناهێلیت کورد و شام پرسێن هەیی د ناڤبەرا خوە دا چارەسەر بکەن
ئەندامەکێ پەرلەمانێ سویدێ دیار دکەت دڤێت وەلاتێن ئێکەتیا ئۆرۆپا فشارێن خوە ل سەر تورکیا زێدەتر لێ بکەن دا تورکیا نەچار بیت ل سووریێ ئاستەنگان ل هەمبەر مافێن کوردان دروست نەکەت، نها تورکیا ل سووریێ ناهێلیت شام و کورد پرسێن هەی د ناڤبەرا خوە دا چارەسەر بکەن.
قادر کاسیرگا ئەندامێ پەرلەمانێ سویدێ د داخۆیانیەکێ دا دیار کر، ل سووریێ رەوشەکا نوو هاتیە پێش، لێ مخابن نها تورکیا ناهێلیت شام و کورد ب رێیا دانوستاندنان پرسێن هەی د ناڤبەرا خوە دا چارەسەر بکەن، بەرپرسێن تورکیا ب هەموو رەنگەکێ بزاڤا ڤێ یەکێ دکەن رێڤەبەریا نوو یا سووریێ ئێرشی دەڤەرێن کوردی بکەت، ژ بەر ڤێ یەکێ ژی دڤێت وەلاتێن ئێکەتیا ئۆرۆپا ل هەمبەر سیاسەتا خراب یا تورکیا بێ هەلوەست نەمینن و گۆت: (دڤێت وەلاتێن ئێکەتیا ئورۆپا ب هەموو شیانێن خوە تورکیا تەنگاڤ بکەن دا تورکیا نەچار بیت ل سووریێ خوە نێزیکی کوردان بکەت، دڤێت تورکیا کوردێن سووریێ وەکو دوژمنێ خوە نەبینیت، ب سالانە کورد ل سووریێ شەڕی بۆ ئازادیا خوە دکەن، نها ژی مافێ کوردانە کو ل سووریایەک نوو و دیموکراتی دا ل گەل هەموو پێکهاتەیێن دی پێکڤە بژین).
ناڤهاتی ئەو یەک ژی دیار کر، کوردان ل سووریێ د شەڕێ ل دژی داعشێ دا گەلەک قوربانی دان، ب سالان رژێما بەشاری هەبوونا کوردان ئینکار کر و ب هەموو رەنگەکێ زۆرداری ل کوردان هاتە کرن، لێ نها رژێما بەشاری نەمایە و رەوشەکا نوو ل سووریێ هاتیە پێش، لێ مخابن نها تورکیا ئاستەنگان دروست دکەت و ناهێلیت کورد ل گەل دەستهەلاتا نوو یا شامێ پرسێن هەی چارەسەر بکەن و گۆت: (بەرپرسێن تورکیا ب هەموو رەنگەکێ کار دکەن دا رێڤەبەریا نوو یا شامێ نەچار بکەن شەڕێ کوردان بکەن، ئەو یەک د بەرژەوەندیا چو ئالیەکێ دا نینە، کوردان گەلەک جاران دیار کرینە وان شەڕ نەڤێت، وان دڤێت ل سووریایەک نوو و دیموکراتی دا ل گەل هەموو پێکهاتەیێن دی وەکو برا پێکڤە بژین، وی دەمی دڤێت وەلاتێن ئێکەتیا ئۆرۆپا ب رۆلێ خوە رابن و تورکیا تەنگاڤ بکەن، دڤێت فشارێن ل سەر تورکیا زێدەتر لێ بهێن دا تورکیا نەچار بیت دەست ژ سیاسەتا خوە یا خراب ل هەمبەر کوردێن سووریێ بەردەت).
ئەندامێ پەرلەمانێ سویدێ ئەو یەک ژی دیار کر، ژ بۆ ئارامیا ل رۆژهەلاتا ناڤین دڤێت ئێدی کورد بگەهنە مافێن خوە، تورکیا ژ ڤێ یەکێ گەلەک دترسیت، ژ بەر ڤێ یەکێ ژی تورکیا رێ نادەت رێڤەبەریا نوو یا سووریێ ل گەل کوردان دانوستاندنان بکەت و پرسێن هەی چارەسەر بکەت و گۆت: (بەرپرسێن تورکیا بەحسێ قۆناغەکا نوو یا ئاشتیێ ل وەلاتێ خوە دکەن، دبێژن دێ پرسا کوردی ل وەلاتێ خوە چارەسەر کەین، چاوا دبیت هوون ل تورکیا بەحسێ ئاشتیێ ل گەل کوردان بکەن و ل سووریێ نەهێلن کورد و شام پێکڤە دانوستاندنان بکەن، ژ بۆ ڤێ یەکێ ژی گرنگە هەموو وەلاتێن ئێکەتیا ئۆرۆپا پێکڤە ل هەمبەر سیاسەتا خراب یا تورکیا خوەدان هەلوەست بن، وەلاتێن ئێکەتیا ئورۆپا دشێن تورکیا نەچار بکەن دەست ژ سیاسەتا خوە یا شاش ل سووریێ بەردەت، هەکە تورکیا دەستێوەردانێ نەکەت دێ کورد و شام شێن پرسێن هەی د ناڤبەرا خوە دا چارەسەر کەن).
ناڤهاتی د دووماهیا ئاخڤتنا خوە دا سوپاسیا هەلوەستێ هەر دو وەلاتێن ئەلمانیا و فرەنسا ل دۆر کوردێن ل سووریێ کر و دیار کر، هەلوەستێ ئەلمانیا و فرەنسا ل دۆر مافێن کوردان ل سووریێ گرنگە، لێ دڤێت ب کریاری هندەک تشت بهێنە کرن، یا هەتا نها هاتیە کرن تنێ داخۆیانی بووینە، لێ وەلاتێن ئێکەتیا ئۆرۆپا دشێن ب سەپاندنا هندەک مەرجان ل سەر دەستهەلاتا نوو یا سووریێ وان نەچار بکەن دا دانپێدانێ ب مافێن رەوا یێن گەلێ کورد بکەن، هەر کەس دزانیت هەتا کورد ل سووریێ نەگەهنە مافێن خوە قەیرانا ل سووریێ ژی دی بەردەوام بیت و گۆت: (بەرۆڤاژی داخۆیانیێن هندەک ژ بەرپرسێن تورکیا، کورد ل سووریێ بەحسێ جودابوونێ ناکەن، بەحسێ پارچەبوونا سووریێ ژی ناکەن، تنێ وان دڤێت بگەهنە مافێن خوە و ئەو یەک ژ بۆ پاشەرۆژا سووریێ ژی گەلەک گرنگە).
