ئیران: ئەمریکا دوژمنێ مە نینە و بەرهەڤین دانوستاندنان بکەین
جێگرێ سەرۆکێ پەرلەمانێ ئیرانێ دیار کر، ئەو ئەمریکا وەکو دوژمنێ خوە نابینن، راستە وان ئاریشێن گەلەک مەزن ل گەل ئەمریکا هەنە، لێ ئەمریکا دوژمنێ ئیرانێ نینە و ئیران یا بەرهەڤە ب رێیا دانوستاندنان هەموو پرسێن هەی ل گەل ئەمریکا چارەسەر کەت، هەکە ئەمریکا بڤێت ئاریشێن هەی ل گەل ئیرانێ چارەسەر بکەت ئیران یا بەرهەڤە.
حەمید رەزا حاجی بابایی ئەو یەک ژی دیار کر، ئیران نها ئسرائیلێ وەکو دوژمنێ خوە یێ سەرەکی دبینیت و ب چو رەنگەکێ ژی ل گەل وی وەلاتی دانوستاندنان ناکەت، لێ بابەتێ ئەمریکا جودایە و نها ئیرانێ دڤێت ل گەل ئەمریکا دەست ب قۆناغەکا نوو بکەت.
چاڤدێرێن سیاسی ژی دیار دکەن، ب هاتنا ترامپی ئەگەرێ ئێرشەکێ ژ ئالیێ ئەمریکا و ئسرائیلێ ل دژی ئیرانێ هەیە و ژ بەر ڤێ یەکێ ژی نها ئیرانێ هەلوەستێ خوە ل دژی ئەمریکا نەرم کریە و بەحسێ دانوستاندنان دکەت، لێ هەتا نها نە ترامپ و نە ژی بەرپرسێن دی یێن ئەمریکا بەحسێ دانوستاندنان ل گەل ئیرانێ نەکرینە.
