زاخۆ ئێكه‌م یانه‌یه پێنج ناسناڤێن كوردستانێ ب ده‌ستڤه دئینت
عەلی حاجی:
تیما باسکتبولا زاخۆ بۆ جارا پێنجێ د دیرۆكا خوه دا ناسناڤێ خولا كوردستانێ بۆ یانه‌یێن پلا نایاب ب ده‌ستڤه ئینا پشتی د یاریا دووماهیێ ب سەرکەڤتی ل سەر تیما ئاسۆ ب ئه‌نجامێ 89- 76 خالان، د یارییا واندا ئه‌وا ل ئه‌ینیا بۆری هه‌ولێرا پایته‌خت هاتیه كرن.
لدور ڤێ چەندێ جوتیار عەلی ڕاهێنەرێ تیما زاخۆ دیار کر بۆ مە شانازییه بشێن بۆ جارا پێنجێ ڤی دەستکەڤتی ب دەستخوەڤە بینین و ببینە ئێکەم یانە ل سەر ئاستێ کوردستانێ ڤێ هژمارەیا ناسناڤان ب دەستڤە بینن ئەڤە ژئ ژ ڤالاهیەکێ نەهاتیە بەلکو ژ کارکرنا چەندین سالان یا بەردەوامە ل سەر ئاڤاکرنا یاریزانان، بێگومان د نوکە دا زاخۆ یا بوویە قوتابخانەیا پێگەهاندنا یاریزانێن باسکێت بۆلێ باشترین بەلگە ژی چەندین یاریزانێن مە د نوکە دا دگەل هەلبژارتیێن جودایێن ئیراقێ نە و سێ یاریزانێن مە ژی د لیستا دەستپێکی یا هەلبژارتیێ ئیکێ یێ ئیراقێ دانە، سال بۆ سال ئاستێ یاریزانێن مە باشتر و بلندتر دبیت، ئەم دێ بەردەوام بین د کارکرنێ دا هەتا کو بشێن ناسناڤێ خولا ئیراقێ یا باسکێت بۆلێ ژی ب دەستخوەڤە بینن و بەر ب ئارمانجێن مەزنتر ڤە بچین.
ناڤبری گۆت ژی: د شیانێن یاریزانێن مە یێن زاخۆ دایە کو ببنە قارەمانا خولا ئیراقێ ژبەر ئاست بلندیا وان یێن بۆ هەلبژاتیێن جودایێن ئیراقێ دهێنە داخاز کرن.
ل دووماهیێ جوتیاری گۆت: پشتەڤانیا بەردەوام یا دەستەیا کارگێریا یانەیا زاخۆ بۆ یاریا باسکتبولێ وەکریە ئەم بشێن کاروانێ ئاڤا کرن و بەرهەم ئینانا یاریزانان دا بەردەوام بین و ڤێ یاریێ بەر ب پێشڤە ببەین.
