یانەیێن زاخۆ، دهۆك و هەولێرێ خوە نێزیكی سەرێ لیستێ كرن
ب دووماهی هاتنا یاریێن گەڕا 17ێ ژ خولا ستێرێن ئیراقێ یا فوتبۆلێ هەڤڕكی بۆ رێزبەندیێن پێشیێ شاریایە و هەرسێ یانەیێن كوردستانی، دهۆك، زاخۆ و هەولێر سەركەفتنێن گرنگ ئینان و نەورۆزێ دو خال ژ دەستدان و شەرێ سەرێ لیستێ دژوارتر لێهاتییە.
تیما فوتبۆلا یانەیا دهۆك ب ئەنجامێ سێ گۆلان بەرانبەر گۆلەكێ مێڤاندارییا یانەیا گەرمە یا باژێرێ ئەنباری كر و سێ خالێن دی پێشكێشی جەماوەرێ خوە یێ ئێكچار مەزن بەرهەڤی یاریێ بووی، د یارییا واندا ئەوا ل چار شەمبیا بوری یاریگەها دهۆك یا نێڤدەولەتی هاتیە كرن، هەرسێ گۆلێن ئەلهۆیێن چیا ژلایێ یاریزانان پیشەكارێ لوبنانی كەریم دەرویش، یێ بەرازیلی مارلۆن دۆسانتۆس و سیابەند عەگید تۆماركرن، گۆلا ئێكانە یا گەرمە فرانك سێدرێك تۆماركر، بڤێ ئەنجامێ یانەیا دهۆك سەركەفتنێن خوە گەهاندنە نەهـ سەركەفتن، بەرانبەر چار وەكهەڤی و چار خوسارەتی هەنە ب31 خالان رێزا پێنجێ پاراست.
بەیار ئەبۆبەكر: هەموو یاریزانان قارەمان بوون
د كۆنگرەیێ رۆژنامەڤانی دا بەیار ئەبۆبەكر كاپتن و ستێرێ یانەیا دهۆكێ گۆت: پیرۆزە ل جەماوەر و پشتەڤانێن یانەیا دهۆكێ ب سەركەفتنەكا ژ هەژی، هەموو یاریزان قارەمان بوون، یارییەكا مەزن هاتە كرن هەموویان ل دووڤ پلانێن ڕاهێنەری كار دكر، تیما گەرمە ئێك ژ هەڤڕكێن بهێز و خودان شیانن، لێ رژدییا مە بۆ سێ خالان وەكر ئەم ئێك خولەكا ژی سیستاهیێ نەكەین بەلكۆ بتنێ هزرا تۆماركرنا گۆلان بكەین.
ڤێ حەفتیێ دهۆك دێ چیتە قەتەر
فدراسیۆنا فوتبۆلا ئیراقێ بڕیار دا یارییا دهۆك یا گەڕا 18ێ كو بڕیار بوو سوبەهی دگەل یانەیا تەلەبە ل پایتەختێ ئیراقێ هاتباكرن ب شێوەكێ فەرمی هاتە پاشئێخستن، ژبەركو تیما دهۆكێ دێ گەشتێ كەت بەر ب وەلاتێ قەتەر ژبۆ ئەنجامدانا یارییا خوە یا گەڕا پێنجێ ژ هەڤڕكیێن كۆما ئێكێ یا قارەمانییا كۆپا كەنداڤێ دگەل یانەیا ئەهلی سەنعا یا یەمەنی ل دەوحە پایتەختێ قەتەرێ ل سێ شەمبییا بهێت كەت.
پاشەنگ سەرێ لیستا گۆلكەرانە
تیما دهۆكێ خوانا نەهـ یاریزانێن پشكداری د تۆماركرنا 24 گۆلان دا هەیە بڤی ڕەنگی، پاشەنگ عەبدوللا شەش گۆل، پیتەر گۆرگیس پێنج گۆل، كەریم دەرویش سێ گۆل، هەر ئێك ژ و شەرقی ئەلبەحری و مارلۆن دۆسانتۆس دو گۆل هەنە، هەروەسان هەر ئێك ژ بەیار ئەبۆ بەكر، یانیك زاكێری، كێلبرت كۆمسۆن، سیابەند عەگید و ئیبراهیم غازی گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
زاخۆ پێنگاڤەكا دی بەر ب پێشڤە هاڤێژت
تیما یانەیا زاخۆ بەردەوامە ل سەر ئەنجامێن خوە یێن باش و شیا سەركەفتنەكا گرنگ و ژ هەژی ل سەر مێڤانا خوە یانەیا نەجەف ب گۆلەكێ بێ بەرانبەر بینت، د یارییا واندا ئەوا ل پێنج شەمبییا بۆری یاریگەها زاخۆ یا نێڤدەولەتی ب حازربوونا جەماوەرەكێ ئێكجار زوور دناڤ یاریگەهێ دا، گۆلا زاخۆ ژلایێ گۆلكەرێ وێ یێ بەرازیلی گۆستاڤۆ هێنریك ڤە هاتە تۆماركرن، ئەڤێ سەركەفتنێ هیڤیێن كوڕێن خابۆری بۆ رێزبەندییا پێشیێ گەشتر لێكرن و شیا ب گەهیتە سەركەفتنا خوە یا نەهێ بەرانبەر پێنج وەكهەڤی و سێ خوسارەتی هەنە كو بنە سەرجەمێ 32 خال رێزا چارێ پاراست بتنێ سێ خال كێمترن ژ خودانا سەرێ لیستێ زەورایێ.
تەلال ئەلبلۆشی: ئەم ل پێش چو ڕوودانا لەزێ ناكەین
د كۆنگرەیێ رۆژنامەڤانی یا پشتی یاریێ دا راهێنەرێ قەتەری و یانەیا زاخۆ تەلال ئەلبۆلشی گۆت: پیرۆزباهیێ ل جەماوەر و كارگێرییا یانەیێ دكەم بڤێ سەركەفتنا گرنگ، یاریزانان گیانێ ب كۆم و شەڕەكێ بەردەوام كر هەتا دووماهی چركە و شیان سەركەفتنەكا ژ هەژی بینن، مە دگەل تیمەكێ دكر هەڤڕكەكا دژوارە د خولێ دا و ب سەركەفتنەكا مەزن بەرانبەر جەوییە هاتبوو یارییا مە، ئەم خوە بەری چو ڕوودانا نا پێشئێخین و لەزێ ناكەین ژبەركو هێشتا خول یا درێژە و دو یاری بتنێ ماینە بۆ دووماهییا قۆناغا ئێكێ، لێ رژدین د وەرزێ ئەڤ سالە دا شەڕی بۆ رێزێن پێشیێ بكەین و نە ڕاوەستیین.
دیدارا بهێت دەلیڤەیە بۆ ڕێزبەندییا باشتر
تیما یانەیا زاخۆ دێ سێ شەمبییا بهێت ل پایتەختێ ئیراقێ بەغدا بیتە مێڤانا حدود و دێ بیتە دەلیڤەیەكا باش كوڕێن خابووری هزر د پێشڤەچوونێ بۆ رێزبەندیەكا باشتر دا بكەت، گرێبەستێن ڤێ دووماهیێ تایبەت دگەل هەردو ستێرێن كورد و هەلبژارتیێ ئیراقێ ئوسامە رەشید و ژێلۆان حەمەد بەلگەیە ل سەر وێ یەكێ زاخۆ هزر د رێزبەندییا پێشیێ دا دكەت.
گۆستاڤۆی گۆلكەرێ كاریگەرە
پشتی تۆماركرنا گۆلێن ڤێ گەڕێ هەردو ستێرێن یانەیا زاخۆ یێ بەرازیلی گۆستاڤۆ هێنریك ب 10 گۆلان و یاریزانێ هەلبژارتیێ ئیراقێ ئەمجەد عتوان ب تۆماركرنا نەهـ گۆلان ل رێزێن ئێكێ و دویێ ل سەر لیستا گۆلكەرێن تیما خوە دهێن، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە كو سەرجەمێ گۆلێن زاخۆ بووینە 27 گۆل د خولێ دا.
هەولێر ب هێز یا ڤەدگەڕیت
یانەیا سێیێ یا كوردستانی د خولا ستێرێن ئیراقێ تیما هەولێرێ یە ئەوا دەستپێكەكا خراب هاتبوو د خولێ دا لێ پشتی بۆرینا سێ حەفتییان شیایە سێ سەركەفتنا ل دووڤ ئێك بینت و دووماهی سەركەفتنا وێ یا گەڕا بۆری دگەل نەفت یا بەغدایی بوو و شیا ب دو گۆلێن پاقژ ب سەركەڤیت، ئەڤێ ئەنجامێ دلخوەشكەر بۆ پشتەڤانێن كەلهە ومنارە ژ رێزا هەشتێ پێشڤەهاتە ڕێزا شەشێ ب كۆمكرنا 28 خالان ژ هەشت سەركەفتن، چار وەكهەڤییانو پێنج خوسارەتی هەنە، یارییا بهێت یا هەولێرییان دێ رۆژا سێ شەمبی بەرانبەر جەوییە ل باژێرێ بەغدا بیت.
دەستدانا خالێن نەورۆزێ بەردەوامن
تیما چارێ یا كوردستانی یانەیا نەورۆزە ئەوا بۆ یارییا سێیێ ل دووڤ ئێك خالان ژ دەستدەن و وەكەڤییا سێیێ دئینت، پشتی دگەل مێڤانا خوە یانەیا ئەلقاسم ب گۆلەكێ تووشی وەكهەڤیێ بوو، ئەڤێ ئەنجامێ نە هێلا نەورۆز پێشڤە بچیت بەلكۆ ب20 خالان رێزا 15ێ هێلا، یارییا بهێت یا تیما سلێمانیێ دێ بەر ب باژێرێ بەسرا چیت رۆژا سێ شەمبیێ بیتە مێڤانا مینا.
ژ ئەنجامێن یاریێن دی
زەورا 1- چنە نەفت میسا میسان، جەوییە 1-2 شورتە، كەربەلا چنە-2 تەلەبە، نەفت ئەلبەسرا1-چنە دیالا، كەرخ 1-1 حدود، كارەبا 2-1 مینا.
هەلوەستێ گشتی یێ ڕێزبەندییا خولێ پشتی ب دووماهی هاتنا یاریێن گەڕا 17ێ یا خولا ستێرێن ئیراقێ بڤی ڕەنگی یە.
1- زەورا 35 خال.
2- شورتە 34 خال.
3- تەلەبە 33 خال.
4- زاخۆ 32 خال.
5- دهۆك 31 خال.
6- هەولێر 28 خال.
7- جەوییە 28 خال.
8- ئەلقاسم 25 خال.
9- نەجەف 24 خال.
10- نەفت 24 خال.
11- نەفت میسان 23 خال.
12- كارەبا 21 خال.
13- گەرمە 20 خال.
14- مینا 20 خال.
15- نەورۆز 20 خال.
16- نەفت ئەلبەسرا 17 خال.
17- ئەلكەرخ 16 خال.
18- كەربەلا 15 خال.
19- حدود 10 خال.
20- دیالا شەش خال.
گۆلكەرێن خولێ پشتی بۆرینا گەڕا 17ێ
هێرشبەرێ یانەیا شورتە موهەنەد عەلی ب تۆماركرنا 13 گۆلان سەرێ لیستا خولێ دهێت، پیشەكارێ بەرازیلی یێ یانەیا زاخۆ گۆستاڤۆ هێنریك ب10 گۆلان رێزا دویێ دهێت، عەلا عەباس ژ جەوییە و ئەمجەد عتوان ژ زاخۆ ب نەهـ گۆلان رێزێن سێیێ و چارێ دهێن، هێرشبەرێ هەولێرێ یوسڤ بن سۆدا ب هەشت گۆلان رێزا پێنجێ، هەر ئێك ژ ئەلحارس حاتم ژ ئەلقاسم، شێركۆ كەریم ژ هەولێر، محەمەد قاسم ژ نەجەف و مەروان حسێن ژ نەورۆز ب حەفت گۆلان رێزێن شەشێ هەتا نەهێ دهێن، پاشەنگ عەبدوللا یاریزانێ دهۆكێ ب شەش گۆلان رێزا 10ێ دهێت.
