ترامپ: دڤێت مسر و ئوردن ئاکنجیێن غەزە وەربگرن
سەرۆکێ ئەمریکا جارەکا دی داخواز ژ هەر دو وەلاتێن مسرێ و ئوردنێ کر چو ئاریشەیان ل هەمبەر وەرگرتنا ئاکنجیێن غەزە دروست نەکەن، چونکی نها غەزە کێر ژیانێ ناهێت و دڤێت خەلکێ وێ ل جهەکێ دی بهێنە ئاکنجیکرن، ژ بەر ڤێ یەکێ ژی مە بەری نها داخواز ژ هەر دو وەلاتێن مسرێ و ئوردنێ کریە کو پێشوازیێ ل هاتنا ئاکنجیێن غەزە بکەن و نها ئەم چاڤەرێینە کو هەر دو وەلات ب رەنگەکێ باش و ئەرێنی پێشوازیێ ل داخوازیا مە بکەن.
دۆنالد ترامپ ئەو یەک ژی دیار کر، رەوشا خەلکێ غەزە گەلەک خرابە و باژێرێ وان ب تەمامی وێران بوویە، گرنگە مسر و ئوردن هەست ب بەرپرسیاریا خوە بکەن و پێشنیازا مە قەبوول بکەن، چونکی وەکو دی چو چارەسەری نینن و دێ رەوشا خەلکێ غەزە خرابتر لێ هێت.
