دەم پارتی بۆ ئاشتیێ دەست ب چالاکیان دکەت
پەیڤدارا دەم پارتی دیار کر، وان دڤێت پرۆسیسا ئاشتیێ ل تورکیا سەربگریت و ژ بۆ ڤێ یەکێ ژی ئەو دێ دەست ب چالاکیان ل هەموو باژێرێن تورکیا و باکورێ کوردستانێ کەن، دڤێت تورکیا شەڕێ ل دژی کوردان راگریت و پرسا کوردی ژی چارەسەر بکەت.
عایشەگۆل دوغان پەیڤدارا دەم پارتی بۆ دەزگەهێن راگەهاندنێ دیار کر، دەمەکە ل تورکیا بەحسێ ئاشتیێ دهێتە کرن، بەری چەند رۆژان ژی دەولەت باخچەلی دیار کر ئێدی دڤێت پەکەکە دەست ژ چەکی بەردەت، مە ژی دڤێت شەڕێ چەندین سالان ل تورکیا ب دووماهی بهێت، لێ ژ بۆ ڤێ یەکێ ژی گرنگە دەولەتا تورکیا ب کریاری هندەک تشتان بکەت، مخابن هەتا نها چو نەهاتیە کرن، دڤێت ژ بۆ چارەسەرکرنا پرسا کوردی ل تورکیا ب کریاری هندەک کار بهێنە کرن و گۆت: (هەتا نها ژی کورد باوەر ناکەن کو دەولەتێ دڤێت پرسا کوردی چارەسەر بکەت، هەتا نها ژی ئەم ب گومانین کا ئارمانجا دەولەتا تورکیا براستی ژی چارەسەرکرنا پرسا کوردی یە یان ژی دیسان دەولەتا تورکیا دڤێت ل ژێر ناڤێ ئاشتیێ پیلانێن جودا بگێریت).
ناڤهاتیێ ئەو یەک ژی دیار کر، ب سالانە عەبدوللا ئۆجەلان بەحسێ ئاشتیێ دکەت، لێ مخابن دەولەتا تورکیا بۆ ئاشتیێ یا بەرهەڤ نینە، ژ بۆ ڤێ یەکێ ژی وەکو دەم پارتی ئەم دێ دەست ب چالاکیێن مەزن ل هەموو تورکیا کەین، دێ ل هەموو باژێرێن مەزن یێن تورکیا و باکورێ کوردستانێ دەست ب چالاکیان کەین و ئارمانجا مە وەکو دەم پارتی ئەوە دا دەولەتا تورکیا ژی هەست ب بەرپرسیاریا خوە یا دیرۆکی بکەت و ژ بۆ چارەسەرکرنا پرسا کوردی ب کریاری هندەک تشتان بکەت و گۆت: (دڤێت بەرپرسێن تورکیا ئێدڤی ڤێ راستیێ قەبوول بکەن هەتا پرسا کوردی ل تورکیا نەهێتە چارەسەرکرن دێ هەردەم رەوشا ئالۆز یا نها ل تورکیا بەردەوام بیت، بێی چارەسەرکرنا پرسا کوردی قەیرانا ئابووری یا ل تورکیا ژی هەر هەبیت و دێ دژوارتر ژی لێ هێت، ژ بەر ڤێ یەکێ ژی دڤێت ئاکپارتی و ئەردۆغان ئێدی بەحسێ شەڕی و ژناڤبرنێ نەکەن، بلا بەحسێ راستیا نها بکەن، بلا هەبوونا گەلێ کورد قەبوول بکەن).
پەیڤدارا دەم پارتی ئەو یەک ژی نەڤەشارت کو ئێدی سەردەمێ خاپاندنا کوردان نەمایە، بلا هندەک کەس وەسا هزر نەکەن دێ شێن جارەکا دی کوردان بخاپینن، ئەڤرۆکە کورد هشیارن و داخوازا مافێن خوە یێن رەوا دکەن، تورکیا ژی نەچارە دانپێدانێ ب هەبوونا گەلێ کورد بکەت، دڤێت کورد بگەهنە مافێن خوە یێن رەوا و گۆت: (ئەزموونا چەندین سالێن بۆری سەلماندیە کو ب شەڕی تورکیا نەشێت ل گۆر خوە پرسا کوردی چارەسەر بکەت، وەکو دەم پارتی ب چالاکیێن خوە مە دڤێت ڤێ پەیامێ بدەینە بەرپرسێن تورکیا کو ب ئاشتیێ دێ هەموو پرسێن هەی هێنە چارەسەرکرن و دێ تورکیا بهێزتر لێ هێت).
