سووریێ بەر ب پارچەبوونێ ڤە دچیت
ئەنجوومەنێ نشتیمانی یێ کوردی دیار کر بێی پشکداریا کوردان کۆنفرانسێ دیالۆگا نشتیمانی یێ سووریێ ناگەهیتە چو ئەنجامان و چاڤدێرێن سیاسی ژی دیار دکەن، دورزی ل سووریێ بەرهەڤیان بۆ راگەهاندنا هەرێمەکا خوەسەر دکەن و ئسرائیل ژی پشتەڤانیێ لێ دکەت و سووریێ دێ پارچە بیت.
ئەنجوومەنێ نشتیمانی یێ کوردی ل سووریێ دیار کر، سازکرنا کۆنفرانسێ دیالۆگا نشتیمانی ل سووریێ بێی پشکداریا کوردان و پێکهاتەیێن دی یێن ل سووریێ چو ئەنجامێن خوە نابیت، مخابن دەستهەلاتا نها یا شامێ گەلەک لەز د سازکرنا کۆنفرانسەکا وەسا دا کر و چو پێکهاتەیێن سووریێ ژی ب فەرمی بۆ کۆنفرانسی نەهاتینە ڤەخواندن و ئەو یەک ژی نیشا ددەت دێ سووریێ بەر ب رەوشەکا دی یا ئالۆز ڤە چیت.
ل ئالیێ دی دروزیێن ل سووریێ بەرهەڤیان بۆ راگەهاندنا هەرێمەکا خوەسەر دکەن و چەند رۆژن ژی جڤاتەکا سەربازی ئاڤا کرینە و کار بۆ ئاڤاکرنا لەشکرەکێ ژی دکەن و بەری دو رۆژان سەرۆک وەزیرێن ئسرائیلێ ژی هۆشداری دا دەستهەلاتا نوو یا سووریێ کو ب چو رەنگەکی خوە نێزیکی دەڤەرێن دروزیان نەکەت، هەکە شام شاشیەک وەسا بکەت دێ ئسرائیل ب توندی بەرسڤا دەستهەلاتا نوو یا شامێ دەت.
ل ئالیێ دی ناموک دوروکان رۆژنامەڤانێ ناڤدار یی تورکیا ژی د راپۆرتەکێ دا دیار کریە کو سووریێ بەر ب پارچەبوونێ ڤە دچیت، چونکی تەحریر شام ب پشتەڤانیا تورکیا دڤێت جارەکا دی دەستهەلاتەکا ناڤەندی ل سووریێ ئاڤا بکەت، لێ نە ئەمریکا و نە ژی وەلاتێن عەرەبی و ئۆرۆپی پشتەڤانیێ ل سیستەمەکێ وەسا ناکەن و د هەمان دەمی دا ئسرائیل پشتەڤانیێ ل هەرێمەکا خوەسەر بۆ کوردان و هەرێمەکا خوەسەر ژی بۆ دروزیان دکەت و د دەمەکێ وەسا دا گەلەک زەحمەتە سووریێ وەکو وەلاتەک ئێکگرتی بمینیت.
چاڤدێرێن سیاسی ژی دیار دکەن، بزاڤێن گرۆپێن چەکدار یێن سەر ب تورکیا و ئێرشێن وان ل دژی کوردان وەسا کر کو ئەمریکا و وەلاتێن رۆژئاڤا هزر د سیستەمەکێ جودا دا بۆ سووریێ بکەن، چونکی نە ئەمریکا و نە ژی ئسرائیل ناخوازن جارەکا دی سیستەمێ سووریێ ببیتە ناڤەندی، ب تایبەتی ژی سیستەمەک وەسا دێ مەترسیێن خوە یێن مەزن بۆ ئسرائیلێ هەبیت و دەمەکە ئسرائیل دبێژیت ئەو رێ نادەن ل سووریێ مەترسی بۆ وان دروست بن، ژ بەر ڤێ یەکێ ژی ئسرائیل نها ب تەمامی پشتەڤانیێ ل دروزیان دکەت و ئاڤابوونا هەرێمەکا خوەسەر بۆ دروزیان رێ بۆ کوردان خوەش دکەت دا ئێدی بریارەکا جودا بدەن.
ل گۆر باوەریا چاڤدێرێن سیاسی فرۆشتنا پەترۆلێ ژ ئالیێ رێڤەبەریا خوەسەر یا رۆژئاڤایێ کوردستانێ بۆ شامێ نیشا ددەت کورد دەست ژ هەرێما خوە بەرنادەن و ژ بەر ڤێ یەکێ ب ئاڤابوونا هەرێما دروزیان و هەبوونا هەرێما خوەسەر یا رۆژئاڤایێ کوردستانێ ئێدی گەلەک زەحمەتە بەحسێ سووریایەکا ئێکگرتی بهێتە کرن.
