یانەیا بەردەڕەش دخوازیت ئەڤسالە هژمارەكا ب هێز بیت
رەمەزان زەكەریا
د داخویانیەكێ دا سەرۆكێ یانەیا بەردەڕەش یا وەرزشی ئاشكراكر وەكو پلان هاتییە دانان بۆ وەرزێ نوو یێ خولا پلە دوا كوردستانێ یا فوتبۆلێ ئەو دخوازن هژمارەكا ب هێزبن د خولێ دا و ل دووڤ بەرنامەیێ هاتییە دانان دەست ب راهێنانا هاتییە كرن.
زێدەتر سەمیر عەبدولقادر بۆ رۆژنامەیا ئەڤرۆ گۆت: بۆ وەرزێ نووی ێ خولا پلا دو یا كوردستانێ ئەم دێ ب هیڤی و ئارمانجێن مەزن هێنە دناڤ هەڤڕكییان دا كو ب هیڤی نە ل وەرزێ نوو سەركەڤین بۆ خولا پلە ئێك ئەوا ئەڤە ئارمانجا هەموو یانەیێ یە، گەشبینم و دۆپاتی ل سەر دكەم ئەڤسالە دێ هژمارەكا ب هێز بین دناڤ خولا پلە دو دا و پلێتا دەربازبوونێ ب دەستڤە بینن سەرباری ئەركێ مە ب سانەهی نابیت.
هەروەسان ناڤهاتی ئەوچەندە ژی گۆت: دهێتە چاڤەرێ كرن ئەڤ سالە یانەیا بەردەڕەش ئاریشێن ئابووری نەبن و بشێت ب هەر ڕێیەكا بیت خوە دەرباز بكەتە خولا پلە ئێك، لەوما ژی ژبۆ ب هێز كرنا رێزێن تیمێ تێمێ هەڤبەست دگەل هژمارەكا یاریزانا هاتیە ئیمزا كرن و هەكە راهێنەر هەر دەمێ پێدڤی ب یاریزانەكێ بوو دێ بۆ ئینین.
سەرۆكێ یانەیا بەردەڕەش دیار كر ژی هەتا نوكە ل دووڤ بەرنامەیێ كادرێ راهێنانێ و پشتەڤانییا كارگێریێ كارەكێ باش و بەرهەڤیێن بەردەوان دهێنە كرن بۆ وەرزێ ئەڤسالە مە باوەریەكا مەزن ب تیما خوە هەیە كو ئەڤسالە دێ گەهینە ئارمانجا خوە و یا پشتەڤانێن یانەیێ.
بۆ زانین بڕیارە هەڤڕكیێن گەڕا ئێكێ یا خولا پلا دو ل 15ێ ڤێ مەهێ دەستپێبكەن و ئێكەم یاری یانەیا بەردەڕەش دێ ژ چارچووڤەیێ كۆما ئێكێ دناڤ ئەردێ خوە بەرانبەر یانەیا شارەزوور كەت.
