ستێرەكا یانەیا ئافرەتێن دهۆكێ خەلاتێ ئۆلمپییا ئیراقێ وەرگرت
پشتی فدراسیۆنا تیكۆنجتسۆ والسكی ب فەرمی ستێرا یانەیا ئافرەتێن دهۆك ئالین بەیار محەمەد بۆ خەلاتێ سالێ یێ لژنەیا ئۆلمپییا ئیراقێ دەستنیشانكری دوهی د رێورەسمێن خەلاتكرنێ دا ل پایتەختێ ئیراقێ بەغدا هاتە خەلاتكرن.
د داخویانیەكێ دا شیمال محەمەد سالح راهێنەرێ تیما یانەیا ئافرەتێن دهۆكێ بۆ رۆژنامەیا ئەڤرۆ گۆت: ل دووڤ بەرنامەیێ لژنەیا ئۆلمپییا ئیراقێ بۆ خەلاتكرنا كچێن وەرزشڤان ئەوێن ناسناڤێن نێڤدەولەتی ب دەستڤە ئیناین كو د بیرەوەرییا رۆژا جیهانی یا ژنان دا بهێنە خەلاتكرن، فدراسیۆنا یارییا تیكۆنجتسۆ والسكی یاریزانا تیما مە ئالین بەیار محەمەد بۆ وەرگرتنا خەلاتێ باشترین یاریزانا كچ یا ڤێ یاریێ دەستنیشان بكەت پشتی شیایی د قارەمانییا عەرەبی دا بۆ كێشا 56 كگم ل سەر ئاستێ لاوان رێزا ئێكێ بهێت ئەوا هەڤڕكیێن وێ ل ئەیارا سالا بۆری وەلاتێ مسر مێڤاندارییا وێ كری، هەروەسان بۆ كێشا 60كگم دا ل سەر ئاستێ لاوان شیابوو ناسناڤێ قارەمانییا ڤەكری یا نێڤدەولەتی ب دەستڤە بینت ئەوا ل چرییا دویێ یا سالا بۆری پارێزگەها دهۆكێ مێڤانداریا وێ كری.
ژلایەكێ دووڤە ناڤهاتی گۆت: ئەڤ پێنگەڤە وەكو ئێكەم یاریزانا كچ ل پارێزگەها دهۆكێ بشێن خەلاتێ وێ وەربگریت، پێنەڤێن وەكو دەستكەفت و خەلاتكرن دێ بیتە پالدەر هەموو یاریزانێن كچ و ڤێ یاریێ زێدەتر خوە ماندی بكەن و هزر د ناسناڤێن باشتر بكەن، مە باوەری ب شیانێن هەموو كچێن یانەیا ئافرەتێن دهۆكێ هەنە، گەشبینن دێ بۆ وەرزێ ئەڤ سالە ئەنجام و دەستكەڤتێن ژ هەژی ئینن.
