ئەتلەتیكۆ ئالایێ تۆلڤەكرنێ بەرانبەر ریال مەدرید بلند كریە
چاڤەڕێ دهێتە كرن ئەڤرۆ چار یاریێن مایی و چارەنڤیس و ئاگرین ل یاریگەهێن ئۆرۆپا بهێنە كرن ئەوێن دێ ژ چارچووڤەیێ هەڤڕكیێن گەڕا دویێ ژ قۆناغا 16ێ یا قارەمانییا چامپیۆنز لیگ بهێنە كرن، یاریگەهێن مترۆبۆلیتانۆ و ئانفێلد دێ بوركانا هەڤڕكیێن ئەڤرۆ بیت.
ئەتلەتیكۆ مەدرید- ریال مەدرید
دێربیەكێ ئاگرین و شەرەكێ هەر سال یێ هەردو یانەیێن ئسپانی، لێ ئەڤجارە د چامپیۆنزێ دا و ئاگرینە و جودایە، بڕیارە ئەڤرۆ ل دەمژمێر 11ی شەڤێ یانەیا ئەتلەتیكۆ مەدرید ل یاریگەها خوە مێڤاندارییا یانەیا ریال مەدرید بكەت، د یارییا ئێكێ دا ئەوا ل سانتیاگۆ بێرنابیۆ هاتییە كرن خودانێن ئەردی ریالێ شیابوو ب 2-1 سەركەفتنێ بینت، بۆ یارییا ئەڤرۆ ئەتلەتیكۆ د ناڤ ئەرد و جەماوەرێ خوە دایە دێ هەموو بزاڤا كەت تۆلێن خوە ڤەكەت و پلێتا دەربازبوونێ بۆ قۆناغا چارێك دووماهیێ وەربگریت، دیدارێن پێشتر یێن هەردو یانەیان د چامپیۆنزێ بتنێ دا 10 یاری بووینە، هەشت یاری د بەرژوەندییا ریال مەدریدێ و ئێك د بەرژوەندییا ئەتلەتیكۆ دا بوویە و یارییەك وەكهەڤی ب دووماهی هاتییە.
ئارسنال- ئایندهۆڤن
د یارییەكا دی یا ئەڤ شەڤە دا ئەوا بڕیارە ل دەمژمێر 11 شەڤ بهێتە كرن یانەیا ئارسنال یا ئنگلتەرایێ دێ مێڤاندارییا یانەیا ئایندهۆڤن یا هۆلەندی كەت بێ گڤاشتن و مەترسی، ژبەركو د یارییا حەفتییا بوریدا شیابوو مەزنترین سەركەفتن بینت و ب حەفت گۆلان بەرانبەر گۆلەكێ سەركەڤیت، لەوما ژی دێ دناڤ ئەرد و جەماوەرێ خوە دا بێ گڤاشتن بیت و بتنێ دێ چاڤەڕێ فیركا دادڤانی بیت بۆ ڕاگەهاندنا فەرمی بەر ب یارییا دووماهیێ، ئانكو یانەیا هۆلەندی بزەحمەت بشێت هەشت گۆلان ل سەر یانەیا ئنگلتەرایی بكەت، دیدارێن پێشتر یێن هەردو یانەیان د چامپیۆنزێ دا چار سەركەفتن ئارسنال ئیناینە بەرانبەر سەركەفتنەكێ بۆ ئایندهۆڤنێ و چار وەكهەڤی هاتینە.
لیل- بۆرۆسیا دۆرتمۆند
بڕیارە ل دەمژمێر 8:45 شەڤ یانەیا لیل یا فرەنسی ل یاریگەها خوە بییار مۆرا مێڤاندارییا بۆرۆسیا دۆرتمۆند یا ئەلمانی كەت، چەنسێ هەردو یانەیان بۆ پلێتا قۆناغا چارێك دووماهیێ بەردەستە ژبەركو د یارییا بوری دا هەردو یانە ب گۆلەكێ وەكهەڤ بوون، لەوما ژی ئەڤ یارییە دێ ئاگرین بیت، یانەیا فرەنسی ئەوا وەكو ئێك ژ سۆپرایزێن چامپیۆنزا ئەڤ سالە هاتییە دیتن و شیابوو د ناڤ رێزبەندییا یانەیێن ئێكسەر هاتینە قۆناغا 16ێ پشتی ل رێزا حەفتێ هاتی ب كۆمكرنا 16 خالان ژ چارچووڤەیێ قۆناغا گشتی ئەوا 36 یانە پشكداربووین، ژلایێ خوەڤە یانەیا بۆرۆسیا دۆرتمۆند دێ كەڤیتە لبن گڤاشتنێن خودانێن ئەردی و ترسا ژ دەستدانا پلێتێ ژی هەیە.
كلۆپ برۆچ- ئەستۆن ڤێلا
یارییا چارێ و دووماهیێ ژ هەڤڕكیێن قۆناغا 16ێ یێن ئەڤ شەڤە ل دەمژمێر 11 شەڤ، یانەیا ئەستۆن ڤێلا یا ئنگلتەرایێ دێ ل یاریگەها ڤێلا مێڤاندارییا یانەیا كلۆب برۆچ یا بەلجیكی كەت و چاڤ ل سەركەفتنا دویێ و دەربازبوونێ یە پشتی د یارییا ئێكێ یا ڤێ قۆناغێ دا ب 3-1 سەركەفت ئینابوو و پێنگاڤەكا باش بۆ قۆناغا هەشتێ هاڤێژتی، هەرچەندە ئەڤە دبیتە دیدارا سێیێ د ئێك وەرز دا پشتی یا گەڕا بۆری و یارییا سێیێ ژ سیستەمێ كۆمان بوو ئەوا یانەیا بەلجیكی شیایی ب گۆلەكێ سەركەفتنێ بینت، ئەستۆن ڤێلا ئێكسەر هاتبوو پشتی رێزا هەشتێ وەرگرتی لێ كلۆب رێزا 24ێ دقۆناغا پاشكۆ دا ل سەر كیستێ ئەتلانتا دەربازبوو ڤێ قۆناغێ، پێشبینیێن هەبوونا ڕیمۆنتادا ژی دهێتە كرن.
