دڤێت فرۆشکار پێدڤیێن بكڕی ل بەرچاڤ وەربگرن
ئەڤرۆ، پەروین سەلاح
ئابوورناسەكی دیار كر، ئەو ئوفەرێن ل هەیڤا رەمەزانێ ژلایێ فرۆشیارانڤە دهێنە پێشكێشكرن، دڤێت ئەم وەك تاكە كەس و خێزان مفای ژی بینین دا تووشی هندەك هنگاڤتنان نەبین و زێدەهیێ د وان تشتان دا نە كەین، تێگەهێ خوارنا زێدە د هەیڤا رەمەزانێ دا تێگەهەكێ خەلەتە و پتریا جاران خێزان ل دەمێ فتارێ دێ رابیت خوارنەكا ب قەبارەكێ زێدە چێكەت باشی دێ بیتە ئەگەر ئەو خارنا زێدە نەهێتە خوارن و هەموو ژی دێ ب هەروە چیت بلا كابانیێن مە هشیاربن خارنا زێدە نە هێتە چێكرن.
دكتور هلوڤان حسنی مامۆستایێ زانكویێ و تایبەتمەندێ ئابووری بۆ رۆژناما ئەڤرۆ دیاركر، سەبارەت هاتنا هەیڤا رەمەزانا پیرۆز دڤێت سەرەدەری دگەل ئابوورێ دروست بهێتە كرن ژلایێ تاكە كەسی و خێزانێ ڤە پێدڤیە دەسپێكا هەیڤا رەمەزانێ پلانەكا ئابووری ئەڤ پلانە یا جیاواز بیت ژ هەیڤێن دی، چونكە هەیڤا رەمەزانێ پتر پێدڤیان ب خوڤە دگریت و پلانا مە یا دارایی ل دووڤ داهاتێ مە بیت و گۆت: هەروەسا د هەیڤا رەمەزانێ گەلەك مەزاختنێن زێدە نە هێنە كرن، ژبەركو پتریا جاران د رەمەزانێ دا ئەم تووشی مەزاختیێن زێدە دبین د هەمی بواراندا و دڤێت ئەم خوە دووربكەین ژ ڤان مەزاختیان، ئانكو مە ئەو پلانا ئابووری ژی هەبیت ئەم هەولبدەین وان تشتان بكرین یێن مە پێدڤی پێ هەبیت، چ خوارن و ڤەخوارنێن رۆژانە بن یان هەر تشت گرێدای هەیڤا رەمەزانا پیرۆز بیت، دا كو تووشی مەزاختیێن زێدە نەبین.
ناڤبری گۆت ژی: ئەو ئوفەرێن ل هەیڤا رەمەزانێ دهێنە پێشكێش كرن ژلایێ فرۆشیارانڤە دڤێت ئەم وەك تاكە كەس و خێزان مفای ژی بینین دا تووشی هندەك هنگاڤتنان نەبین و زێدەهیێ د وان تشتان دا نە كەین، بۆ نموونە گەلەك جاران قەستا جهەكی دێ كەین داشكاندنا دانایە سەر تشتێن خۆ و ئەم رابین زێدەتر ژ پێدڤیا خۆ بكرین و ئەو كەلۆ پەل دووماهیێ ئەو قەبارێ مە كری نە هێتە مەزاختن دێ بیتە تێچوویەكێ زێدە ل سەر مە یا گرنگ ئەم مفای ژ وان ئوفەران وەربگرین، وەك سەرەدەریەكا دروست یا ئابووری دگەل دا بهێتە كرن و بەراوردیەكێ بكەین دناڤبەرا ئوفەران دا و ئوفەرێن هاتینە دان ژ لایێ فرۆشیاران ڤە هەولبدەین كێمترین بها بدەست خوڤە بینین.
هلوڤان حسنی ئاماژەكر: تێگەهێ خارنا زێدە د هەیڤا رەمەزانێ دا تێگەهەكێ خەلەتە پتریا جاران خێزان ل دەمێ فتارێ دێ رابیت خوارنەكا ب قەبارەكێ زێدە چێكەت، پاشی دێ بیتە ئەگەر ئەو خارنا زێدە نەهێتە خارن و هەمی ژی دێ ب هەروە چیت.
