کوردێن رۆژئاڤایێ کوردستانێ ل دژی دستوورێ نوو یێ سووریێ نە
هەموو هێز و ئالیێن سیاسی یێن رۆژئاڤایێ کوردستانێ نەرازیبوونا خوە ل هەمبەر دستوورێ نوو یێ سووریێ دیار دکەن و ئاماژە ب ڤێ یەکێ دکەن د دستووری دا ئاماژە ب کوردان و پێکهاتەیێن دی یێن ل سووریێ نەهاتیە کرن و هەروەسا دورزی ژی هەمان هەلوەست نیشا دان.
پشتی کو دەستهەلاتا نوو یا شامێ پرۆژەیێ دستوورێ نوو یێ سووریێ راگه‌هاند، رێڤەبه‌ریا خوه‌سه‌ر، جڤاتا سووریا دیموکرات، ئه‌نجوومه‌نێ نشتیمانی یێ کوردی ل سووریێ و گەلەک هێزێن دی یێن رۆژئاڤایێ کوردستانێ ب داخویانیێن جودا جودا دستوورێ نوو یێ سوریێ رەت کرن. د ڤێ مژارێ دا رێڤەبه‌ریا خوه‌سه‌ر یا رۆژئاڤایێ کوردستانێ راگه‌هاند، کو ره‌شنڤیسا دستوورێ نوو یێ سووریێ، کو ژ ئالیێ ده‌ستهه‌لاتا نوو یا شامێ ڤه هاتیه ئاماده‌کرن ژ راستیا سووریێ دووره و چ جوداهیا وێ ژ دستوورێ به‌رێ یێ سووریێ نینه و ئه‌ڤ ره‌شنڤیس هه‌بوونا پێکهاتەیێن جودا یێن ل سووریێ ره‌ت دکه‌ت، بۆ ڤێ چه‌ندێ ژی ئاشکرا کرن کو ئه‌و پێگیریێ ب وی دستووری ناکه‌ن، چونکی دستوورێ نوو جارەکا دی سووریێ بەر ب دیکتاتوریەتێ ڤە دبەت و ئەو یەک ب چو رەنگەکێ ناهێتە قەبوول کرن.
ل ئالیێ دی ئەنجوومەنێ نشتیمانی یێ کوردی ل سووریێ ژی دیار کر، دستوورێ نوو ب تەمامی ل دژی راستیا سیاسی و جڤاکی یا سووریێ یە، د دستوورێ نوو یێ هاتیە ئامادە کرن دا هەبوونا هەموو پێکهاتەیێن ئایینی و باوەریێن جودا جودا ل سووریێ هاتیە پشتگوه ئاڤێتن و مافێن پێکهاتەیێن ل سووریێ ژی وەسا ناهێتە پاراستن، ئانکو دیارە دیسان کار بۆ ڤێ یەکێ دهێتە کرن کو پێکهاتەیەک ب تنێ ل سووریێ دەستهەلاتدار بیت و بێگومان ئەو یەک دێ سووریێ تووشی ئاریشەیێن گەلەک مەزن کەت و ئەو وەکو ئەنجوومەنێ نشتیمانی یێ کوردی ل سووریێ ب توندی ل دژی وی دستوورێ نە و قەبوول ناکەن.
ل ئالیێ دی پێکهاتا دورزی ل سووریێ ژی نەرازیبوونا خوە ل هەمبەر دستوورێ نوو نیشا دان و دیار کرن پێدڤیا سووریێ ب دستوورەک نوو و دیموکراتی هەیە کو مافێ هەموو پێکهاتەیێن ل سووریێ تێدا پاراستی بیت، لێ یا نها هاتیە کرن ب تەمامی بەرۆڤاژی راستیا نها یا سووریێ یە.
وەلاتیێن کورد ل رۆژئاڤایێ کوردستانێ ژی ل هەمبەر دستوورێ نوو یێ سووریێ خوەنیشادان کرن و داخواز کرن دستوورەک نوو بهێتە نڤیسین، کو مافێ کوردان و هەموو پێکهاتەیێن دی تێدا پاراستی بیت.
