ئەڤرۆ خولێن نایاب و ئێكا كوردستانێ ئاگرینن
قەیس وەیس:
چاڤەڕێ دهێتە كرن ئەڤرۆ هەڤڕكیێن گەڕا 23ێ ژ خولا پلا نایابا كوردستانێ و یاریێن گەڕا 15ێ و دووماهیێ یا خولا پلا ئَێكا كوردستانێ ب ئەنجامدانا چەند یارییان، یانەیێن كوردستانێ د هەردو خولان دا ئارمانجێن جودا هەنە ئەوێن بڕیارە هەموو یاری ل دەمژمێر2:30 پشتی نیڤرۆ بهێنە كرن.
د خولا پلا نایاب دا
د دێربیەكێ تایبەت یێ پارێزگەهێ دا بڕیارە تیما فوتبۆلا یانەیا ئاكرێ ل یاریگەها خوە یانەیا زاخۆ مێڤان كەت كو دهێتە هژمارتن ئێك ژ یاریێن ب هێز بۆ هەردو تیما، كوڕێن خابووری ئەوێن هەڤڕكیێ بۆ سەرێ لیستێ دكەن د نوكە دا خودانێن 41 خالان رێزا سێیێ دهێت كێمتر دو خالان ژ یانەیا شێروانە ئەوا ل سەرێ لیستێ دهێت، ژلایێ خوەڤە یانەیا ئاكرێ رێزا شەشێ دهێت ب كۆمكرنا 29 خالان، ئەڤ یارییە تایبەتمەندیا خوە هەیە بۆ هەردو یانەیان، زاخۆ دێ بزاڤێن سەركەفتنێ كەت ژبۆ بەردەوامییا هەڤڕكیێ بۆ ناسناڤی، لێ یانەیا ئاكرێ دێ بزاڤێ كەت هیڤیێن خوە ب هێز بێخیت و چاڤ ل ئەنجامێ یاریێن دیتر بیت.
ژ یاریێن دی یێن خولێ، ئەڤرۆ، ڕزگاری- هندرین، ڕانیە- پیشەسازی، یاریێن سوبەهی، دەربەندیخان- پێشمەرگەیا هەولێر، سیروانی نوو- هەولێر، شێروانە- برایەتی، ژبەر خوە ڤەكێشانا سەید سادق ژ خولێ هاتییە هژمارتن خوسارەت دگەل چوارقۆرنە، دڤێ گەڕێ دا یانەیا شەقلاوە یا چاڤەڕێ بیت.
د خولا پلا ئێك دا
بڕیارە هەر ئەڤرۆ پەردە ل سەر هەڤڕكیێن خولا پلا ئێكا كوردستانێ بهێتە دانان و خول ب دووماهی بهێت ب ئەنجامدانا حەفت یارییان ژ گەڕا 15ێ و دووماهیێ، چار یانە هەڤڕكیێ بۆ دو پلێتێن دەربازبوونێ بەر ب پلا نایاب دكەن و یانەیێن پارێزگەهێ دێ بفەرمی مانا خوە د خولێ دا ئێكلاكەن.
چاڤەڕێ یە تیما یانەیا دهۆك ببیتە مێڤانا یانەیا ڕواندز د یارییەكا دهێتە پێشبینیكرن بۆ ئەلهۆیێن چیا ب زەحمەت نەبیت ژبەركو خودانێن ئەردی ل رێزا دووماهییا خولێ یە ب سێ خالان و پاشڤەچوون بۆ پلا دو یا كوردستانێ مسۆگەركرییە، لێ یانەیا دهۆكێ ئەوا 14 خال هەین رێزا نەهێ دهێت دێ ب فەرمی مانا خوە ڕاگەهینیت د خولێ دا.
ژلایێ خوەڤە یانەیا سێمێل ئەوا ل دەستپێكێ هیڤی و ئارمانجێن دەربازبوونێ بۆ پلا نایاب هەبووین لێ ژبەر گوهۆڕینێن نە چاڤەڕێ كر ئەو ئارمانجە ژ دەستدایە و دێ ل یاریگەها خوە مێڤاندارییا بابان كەت و مانا خوە د خولێ دا هەتا وەرزێ بهێت ئێكلاكەت، سێمێل خودانا 13 خالانە رێزا 10ێ دهێت و مێڤانا وێ 12 خال هەنە رێزا 12 دهێت.
ژلایێ خوەڤە یانەیا تەناهی هەمان هیڤی و ئارمانجێن وێ یا پلێتا دەربازبوونێ ژ دەستدایە ب تنێ وەكو هەردو یانەیێن دی یێن پارێزگەهێ دێ مانا خوە د خولێ دا كەتە فەرمی، ئەوا دێ ل یاریگەها خوە زانكۆیا دهۆك مێڤاندارییا یانەیا بازیان كەت، تەناهی خودانا 12 خالانە رێزا 11ێ دهێت و بازیان 22 خال هەنە رێزا پێنجێ دهێت، ژ یاریێن دی یێن ئەڤرۆ، سۆران- كۆیە، هەلۆ- زانكۆیا جیهان، كفری- خاك، شۆرجە- قەلادزێ و چەمچەمال یا چاڤەڕێ كری بیت.
