ئێكەم سەركەفتنا كوڕێن كوڕەژاری د خولا كوردستانێ دا
شاهۆ فەرید:
تیما فوتبۆلا یانەیا شێلادزێ ئێكەم سەركەفتن د خولا پلا دو یا كوردستانێ دا ئینا پشتی دگەل یانەیا خەلاتی پێنجوین ب گۆلەكێ بێ بەرانبەر سەركەفتنین، د یارییا واندا ئەوا ژ چارچووڤەیێ گەرا ئێكێ خولێ ل یاریگەها گۆلان ل باژێرێ شێلادزێ هاتییە كرن، گۆلا سەركەفتنێ ژلایێ یاریزان قادر رەشید هاتە توماركرن.
ل دۆر ڤێ سەركەفتنێ د داخویانیەكێ دا كاروان باقی سكرتێریێ یانەیا شێلادزێ بۆ رۆژنامەیا ئەڤرۆ دیاركر: ئێكەم پێنگاڤا مە د خولێ دا یا سەركەفتی بوو ژبەركو ئەڤ سەركەفتە بۆ مە گەلەك یا گرنگ بوو د ناڤا ئەرد و جەماوەرێ مە دا و سوپاسیا بەرهەڤبوون و پشتەڤانییا وان دكەین ئەون ژ راستی ژی بووینە یاریزانیێن هژمارە 12 د ناڤا یاریگەهێ دا و بێ راوەستیان پالپشتی دكرن، هەرچەندە كاروانێ خولێ یێ درێژە و نە شێن چو بەلینا بدەین لێ ئەڤی سەركەفتنێ هیڤیێن مە گەشكرن بۆ هەردو یاریێن بهێن ئەوێن ژ دەرڤەیی یاریگەها مەنە.
كاروان باقی گۆت ژی: ژبەركو چەندین یاریزانێن مە ب رۆژی بوون ئەو ئاستێ پێدڤی پێشكێش نەكرن، چەندین دەلیڤەیێن گولێ توماركرنێ مە ژ دەست دان، بۆ یاریا بهێت بەرامبەری ئاسۆ دێ كادرێ راهێنێ و یاریزان هەموو بزاڤا كەن ئەوان شاشیێن د یارییا ئێكێ دا هاتینە دیتن بۆ یارییا دویێ چارەسەربكەن، ژبەركو ژ دەستدانا هەر خالەكێ قەرەبوو بۆ نابیت، د وەرزێ ئەڤ سالەدا مە باشتر بەرهەڤی كرینە ژ دو وەرزێن پێشتر، گەشبینن دێ بینە هژمارەكا زەحمەت بۆ هەموو تیمێن كۆما خوە دا، ئەڤی وەرزی مە هیڤی هەنە پلێتا دەربازبوونێ بۆ خولا پلا ئێكا كوردستانێ دەستڤەبنین.
