دهۆك دخوازیت ژڤانێ یاریێن پاشئێخستی نە هێنە دانان
د داخویانیەكێ دا ڕێڤەبەرێ تیما فوتبۆلا یانەیا دهۆك یا وەرزشی دیار كر ب نڤێسارەكا فەرمی داخواز ژ فدراسیۆنا فوتبۆلا ئیراقێ كرییە ژڤانێ یاریێن پاشئێخستی یێن تیما وان د خولا ستێرێن ئیراقێ دا نە هێتە دیاركرن هەتا ڤەگەڕیانا یاریزانێن وان بۆ ناڤ رێزێن تیمێ.
زێدەتر جاسم محەمەد حاجی گۆت: پشتی هەر ئێك ژ هارۆن ئەحمەد، پیتەر گورگیس بۆ ناڤ رێزێن هەلبژارتیێ ئیراقێ یێ نشتیمانی و كەریم عەبد دەرویش بۆ هەلبژارتیێ لوبنانێ هاتینە داخوازكرن، مە ب نڤێسارەكا فەرمی بۆ فدراسیۆنا فوتبۆلا ئیراقێ هنارتییە تێدا داخواز كرییە ئەو هەر پێنج یاریێن مایی ژ هەڤڕكیێن خولا ستێرێن ئیراقێ یێن پاشئێخستن چو ژڤان بۆ نە هێنە دیاركرن و مە خواستییە پشتی ڤەگەڕیانا وان بۆ تیمێ ژ نوو ژڤان بهێتە دانان.
هەروەسان ناڤهاتی گۆت: ژبەركو هەر سێ یاریزان سەنگا خوە یا هەیی دناڤ تیمێ دا و یێن كاریگەرن دگەل یاریزانێن مە لەوما ژی نە پشكدارییا وان د دەمێ ئەنجامدانا یاریێن پاشئێخستی دا دێ كارتیكرنا خوە ل سەر ئاست و ئەنجامێن مە هەبیت، ژبەركو ئەو یاریێن مایی ژی ب هێزن ئەوێن دێ دكەل شورتە، تەلەبە، هەولێر، نەفت میسان و دیالا هێنە كرن، وەكو مافەكێ مە ل دووڤ ڕێنمایان هەر یانەیەكا سێ یاریزانێن وان دناڤ هەلبژارتییەكێ وەلاتەكی دا بن دشێت داخوازا پاشئێخستنا ژڤانێ یاریێن خوە كەت.
بۆ زانین تیما یانەیا دهۆك بۆ جارا ئێكێ د دیرۆكا خوە و یا ئیراقێ دا دەرباز دبیتە یارییا دووماهییا كۆپا كەنداڤی پشتی د هەردو یاریێن هاتن و چوونێ دا دو سەركەفتن ئینایین ب گۆلەكێ بێ بەرانبەر دگەل یانەیا ئیتفاق یا سعۆدیێ، ئەوا دهێتە چاڤەڕێ كرن یارییا دووماهیێ دگەل یانەیا قادسیە یا كوێتی بكەت ئەوا ژلایێ خوە ڤە ل سەر كیستێ یانەیا نەسر یا ئیماراتی هاتییە یارییا دووماهیێ، فدراسیۆنا كەنداڤی دێ ژڤان و شێوازێ یارییا دووماهیێ د ڤێ حەفتیێ دا دیار كەت و دبیت ئێك یاری بیت یان ژی دو یاری بهێنە كرن.
