رۆحانی: دڤێت ئیران ل گەل ئەمریکا دانوستاندنان بکەت
حەسەن رۆحانی سەرۆک کۆمارێ بەرێ یێ ئیرانێ د داخویانیەکێ دا بۆ دەزگەهێن راگەهاندنا وی وەلاتی دیار کر، رەوشا ئیرانێ گەلەک خرابە، ژیان بۆ خەلکی گەلەک زەحمەت بوویە، مخابن بەرپرسێن دەولەتێ ئاگەه ژ رەوشا ژیانا خەلکی نینن، هەکە رەوش وەسا بەردەوام بکەت دێ کارەساتێن گەلەک مەزن ل ئیرانێ روو دەن، دڤێت یێن نها وەلاتی برێڤە دبەن ل گۆر راستیێن هەی سیاسەتێ بکەن.
سەرۆک کۆمارێ بەرێ یێ ئیرانێ ئەو یەک ژی دیار کر، دڤێت ئیران ل گەل ئەمریکا دانوستاندنان بکەت، راستە نها رێبەرێ ئیرانێ عەلی خامنەیی ل دژی دانوستاندنانە، لێ دبیت پشتی چەند مەهێن دی رەوش ب تەمامی بهێتە گوهۆڕین، هەکە ئیران ل گەل ئەمریکا دانوستاندنان نەکەت دێ رەوشا ئابووری گەلەک خراب بیت و دبیت سزایێن گەلەک مەزنتر ژ چەندین سالێن بۆری ل سەر ئیرانێ بهێنە سەپاندن و وی دەمی خەلک دێ ل دژی دەستهەلاتێ رابن.
