بێكاری
نوورا جەعفەر شیمۆ
خریایە كو بێكاری بابەتەكێ گرنگێ ئابووری و جڤاكی یە، هەروەسا كاریگەریەكا زۆر ل سەر تاكی و جڤاكێ یا هەی.
ل هەرێما كوردستانێ بێكاری پرسگرێكەكا گرنگا ئابووری و جڤاكی یە. ل دویڤ داتایان رێژەیا بێكاریێ ل سالا ٢٠١٣ «٦٬٥ ٪» بو و ل سالا ٢٠١٥ رێژەیا بێكاریێ بەرز بوو ژبۆ «٩٪» ئانكو ل وی دەمی نێزیكی ١٩٥ هزار بێكار هەبوون. هەروەسا ل سالا ٢٠١٦ رێژەیا بێكاریێ زێدەتر بەرزبوو كو گەهشتە ١٤٪.
ل گۆرەی داتایان دیار دبیت كۆ رێژەیا بێكاریێ سال بۆ سالێ زێدە بوویە. كو ئەڤ پرسگرێكە هەتا نها ژی یا بەردەوامە.
بەرزبوونا رێژەیا بێكاریێ ل هەرێما كوردستانێ چەندین ئەگەران ب خۆڤە دگریت ژ وان ژی (راگرتنا پرۆژەیێ وەبەرهێنانێ / زێدەبوونا كرێكارێ بیانی) و چەندین ئەگەرێن دی ژی .كو د چەندین سالێن بۆری دا هەرێما كوردستانێ رویبروی چەندین قەیرانێن ئابۆری بوویە كو ئەڤە ژی ئێك ژ وان ئەگەرانە كو رێژەیا بێكاریێ د بەرزبوونێ دایە.
بێكاری ئێك ژ وان پرسگرێكایە كو دبیتە ئەگەرێ تێكدانا تەرازویا ئابووری یا وەلاتی و هەروەسا پرسگرێكەكا جڤاكی یە كو دبیتە ئەگەرێ زێدەبوونا ئاریشەیێن جڤاكی.
رێژەیا گەنجێن بێكار ل هەرێما كوردستانێ د زێدەبوونێ دایە كو ئەڤە ژی بوویە ئەگەرێ نەرازیبوونێ ل دەف گەنجێن هەرێمێ كو بوویە هۆكارێ وێ چەندێ كو گەنجێ هەرێمێ بەر ب چەند رێكارێن دی بچیت كو ژ وان رێكاران مشەختبوونا گەنجێن هەرێمێ بەر ب وەلاتێن بیانی ڤە كو ئەڤە ژی دبیتە ئەگەرێ دروستبوونا كێشەیەكا مەزن د وەلاتی دا و كێمبوونا رێژەیا گەنجان .
بۆ چارەسەركرنا ڤێ پرسگرێكێ پێدڤیە رێككارێن تایبەت لبەر چاڤ بهێنە وەرگرتن و نەهێلانا وان هۆكاران یێن كو دبنە ئەگەرێ دروستبوونا بێكاریێ، بۆ نموونە گەنجێ هەرێمێ ل جهێ كرێكارێ بیانی كار بكەت و زێدەكرنا پرۆژەیێن وەبەرهێنانێ داكو ببیتە دەلیڤەیەك بۆ گەنجان و بشێن كاربكەن.
گەنج لایەنەكێ ب هێزە بۆ پێشڤەبرن و دروستكرنا وەلاتەكێ پێشكەڤتی.
