ئـادار…. بیرەوەری و خـۆڕاگـری
عەبدولرەحمان مەحموود
ئادار هەیڤا بیرەوەری و خۆشی و نەخوشیێن گەلێ مە یە، قەدەر وەسابوویە كو پڕانیا بیرەوەریێن گەلێ مە بكەڤنە د ڤێ هەیڤێ دا، ژوان بیرەوەریان هند تراژیدینە و هندژی هەلكەفت و رویدانێن خۆش و دلڤەكەرن، میناك سەرهلدانا گەلێ كورد ل ٥ ی ئادارا سالا ١٩٩١ ل باژێڕێ ڕانیا دەستپێكر و مللەتێ كورد ژ زولم و ستەما ڕژێما سەدامێ گۆڕبەگۆڕ ڕزگاربوو، هەردیسا جەژنا نەورۆزێ كو هەرسال ل ٢١ ئادارێ خەلك جەژن و شاهیان ب ڤێ هەلكەفتێ دگێڕن، دیسا بەیاناما ١١ی ئادارێ كو د ڤێ ڕێكەفتنێ دا مافێن گەلێ كورد هاتنە چەسپاندن، هەردیسا ژ وان ڕویدانێن دلتەزین یێن گەلێ مە یێن كەفتینە د ڤێ هەیڤێ دا، ئەوژی رویدانا جەرگبڕا كێمیا بارانكرنا باژێرێ هەلەبجە ل ١٦ ئادارێ، ژ ئەنجامێ كێمیا بارانكرنا باژێڕێ هەلەبجە ٥٠٠٠ هزار كەس ژ خەلكێ سڤیل شەهیدبوون، هەردیسا بۆیەرەكا دی یا دلتەزین و یاكو پتر برینێن خەلكێ كوردستانێ كویركرین، ئەوژی وەغەركرنا بارزانیێ نەمربوو ل ١/٣/١٩٧٩ و سێدارەدانا پێشەوا قازی محەمەد ل ٣١ ی ئادارێ، ئەم دشێین بێژین دڤێ هەیڤێ دا خوشی و نە خوشیێن مللەتێ كورد تێكەل بووینە، سەرەڕای ڤان هەمی نەخوشیان ژی هیچ دەم و ساتەكی مللەتێ كورد دەست ژخەباتا خۆ یا نەتەوەیی بەرنەدایە ل تەڤ مەه و سالان دچەپەرێن بەرخودان و بەرەڤانی كرنێ دابوون، لێ پتریا ڕویدان و بیرەوەریێن گەلێ مە كەفتینە دڤێ مەهێ دا، وەسا خواستییە ڤێ هەیڤێ جهەك تایبەت د ناڤ دیرۆكا بیرەوەریێن گەلێ مەدا هەبیت، د كۆكا خۆدا مەها ئادارێ د ناڤ ڕۆپەلێن دیرۆكا پرشەنگدارا گەلێ مە دا كۆمەكا وانەیێن كوردایەتیێ د ناڤ خوەدا هەمبێز كرینە، مینا ب هیڤی بوون بۆ گەهشتنا ئارمانجان، باوەری ب خۆبوون، دەست دانەهێلان بۆ دوژمنێن ئاشتی و ئازادیێ و ل سەر هەر نەخۆشیەكێ ئارام گرتن، خەباتكرن ل پێناڤی بدەستڤەئینا نا مافان، ئەڤە هەمی كۆمەكا وانەیێن پڕ بهانە و دڤێت ژڤان ڕویدانێن دیرۆكیێن كەفتینە د ڤێ مەهێ دا ئەم فێری ڤان هەمی وانەیێن كوردایەتیێ ببین و بزانین گەلێ كورد گەلەك رۆژێن سەخت و دژوار بڕێ كرینە و جۆبارێن خوینێ بۆ دۆزا خۆ ڕێتیە و هیچ دەمەكی دبەرهەڤ نینن دەست ژ خەباتا خۆ بەردەن و هەمی دەما خودان ئیرادەك ب هێز و پۆلاین و دوژمن بەزین بووینە و هەردەم د چەپەرێ بەرخودان بەرەڤانیكرنێ داینە ژبۆ گەهشتنا ئارمانجا خۆیا بنگەهین كو ئەو ژی دەولەتبوونا كوردستانێ یە و ئەڤە ژی خەون و هیڤییا هەرتاكەكێ كوردە وەك مافەكێ وی یێ ڕەوا و خۆ ببینیت خودان وەلاتەكێ ئازاد و سەربەخۆ.
