مرۆڤێن بەرژەوەندیخواز
عەبدولرەحمان مەحموود
د جڤاكێ مە دا مرۆڤێن بەرژەوەندخواز زۆر بووینە و بتنێ وی دەمی ل دەرگەهێن مە ددەن ئەو دەمێ كارەك ب مرۆڤی هەبیت، دەمێ دزانن تو دشێی مفایەكی بگەهینیێ، ب زمانەكێ شرین و پەسنێن زێدە خۆ نێزیكی مرۆڤی دكەن، بەلێ هەكە زانی تو یێ درەوشەكا خراب دا، یان تو نەشێی چو خزمەتان پێشكێشی وان بكەی، ئێدی تو ل دوورێن خۆ نابینی و بتنێ ملێن خۆ د دەنە ملێن كەسێن بهێز، هەموو پێكولێن وان ئەون مفای ژ دەوروبەرێن خۆ بینن، ژ بۆ ڤێ ئێكێ ب هەر ڕەنگەكێ هەبیت دێ خۆ نێزیكی مرۆڤی كەن، لێ هەكە نەشیان وێ ب دەست خۆ ڤە بینن یا وان بڤێت؛ دێ خۆ ژ مرۆڤی دووركەن و چو پەیوەندیەكێ دناڤبەرا مرۆڤی و خۆ دا ناهێلن، ئەڤە ژی دیاردەكا كرێتە و كارتێكرنەكا ڕاستەوخۆ ل سەر پەیوەندیێن تاك ب تاكێ جڤاكی دكەن و دبیتە ئەگەرێ وێ ئێكێ، خاڤبوون د پەیوەندیێن جڤاكی دا دروست ببیت و مرۆڤ ئێدی ب ساناهی پەوەندیان دگەل كەسێ گرێ نەدەت و دووراتیەكێ دناڤبەرا خۆ و تاكێن كومەلگەهێ دا دروست بكەت، هەلبەت د ژیانێ دا ئەم تووشی چەندین جۆرێن مرۆڤان دبین، هندەك ژ وان وەك سیبەرا مرۆڤی نە، بتنێ ل دەمێ خۆشی و دەستكەفتان دیار دبن، لێ هەردەمێ ئەور هاتن و تاریاتیێ جیهان گرت، ئەو ژی بەرزەدبن، ئەڤە ئەو مرۆڤێن بەرژەوەندخوازن یێن كو پەیوەندیێن وان ل سەر بنەمایێ مفای دهێنە ئاڤاكرن، نەك ل سەر بنەمایێ وەفاداریێ، ئەڤجار مرۆڤێن بڤی ڕەنگی دڤێت گەلەك لێ د هشیار بین و هەر زوی مرۆڤ ڤان جۆرە كەسان بنیاسیت، تاكو بشێت خۆ ژ خەفك و داڤێن وان ب پارێزیت.
مخابن ئەڤ جۆرێ مرۆڤان كارتێكرنێ ل سەر ڕەفتارێن كەسانێن ناڤا جڤاكی دا دكەن و دبنە ئەگەرێ خاڤبوونا پەیوەندیان و نەمانا هەستێ هاریكاری و خۆبەخشیێ و دبنە فاكتەرێ دروستبوونا جڤاكەكێ مادی، كو تێدا بەهایێن ئەخلاقی دهێنە ژ دەست دان و دبنە قوربانی بۆ ب دەستڤەئینانا داهاتەكی، یان ژی پلە و پۆستەكی، ئەڤجادڤێت سنووران بۆ ڤان جۆرە مرۆڤان دانین و ڕێ نەدەین بتنێ بۆ مەرەم و بەرژەوەندیێن خۆ تێكەلیێ دگەل مرۆڤی بكەن.
