فەستیڤالا فلمێن كوردی یێن (مۆبایلێ) ل سلێمانیێ دێ هێتە گێڕان
زنار تۆڤی:
هونەرمەند (كامەران نوری گولالە) رێڤەبەرێ پشكا هونەرێ سینەمایێ ل سلێمانیێ، هەڤدەم رێڤەبەرێ فەستیڤالا فلمێن كوردی یێن مۆبایلێ یە ل سلێمانیێ، د دیدارەكێ دا بۆ رۆژنامەیا ئەڤرۆ دیاركر كو بڕیارە ل دەستپێكا هەیڤا پێنج ئەو فەستیڤال بهێتە گێڕان، رێڤەبەرییا گشتییا رەوشەنبیری و هونەری ل سلیمانیێ (پشكا هونەرێ سینەمایێ) ب هەڤپشكی ل گەل (سازییا ڤیم) ب كارێ بەرهەڤكرنا وێ رابووینە و نوكە ستافێ فەستیڤالی دكاری دانە و بۆ دەمێ سی رۆژان دێ یا بەردەوام بیت.
ناڤهاتی گۆت: هەتا نوكە چەندین فلم گەهشتینە بەر دەستی مە، پرانیا وان د ئاستەكێ بلند دانە و هندەك ژ وان ل فەستیڤالێن دەرڤەیی هەرێما كوردستانێ پشكدار بووینە، هەروەسا ئەڤ فەستیڤالە دێ پێشوازیێ ل هەر فلمەكی كەت، ل هەر جهەكێ دونیایێ بیت، ب مەرجەكی ناڤەرۆك و چیرۆكا فلمان كوردی بیت، دەربارەیی فلمێن پشكدار، فەستیڤالا مە، سێ مەرجان بەرچاڤ دگریت بۆ پشكداریكرنێ، ئەو ژی (دڤێت فلم ب مۆبایلێ هاتبیتە وێنەكرن، دەمێ پشكداریكرنێ ژ 15 خولەكان دەرباز نەبیت، ناڤەرۆك و چیرۆكا فلمی كوردی بیت) دیسان فلمساز یێ ئازادە، فلمەكێ (فیكشن یان دیكۆمینتاری) بەرهەم بینیت و پشكداریێ د فەستیڤالێ دا بكەت، دووماهی ژڤان بۆ هنارتنا فلمان، هەتا رۆژا 15/4/ 2025 ێ یە، مە دەه خەلات ئامادەركرینە، هەروەسا سازییا ڤیم وەكو هەڤپشكێ مە، ل فەستیڤالێ خەلاتەكێ تایبەت بۆ فلمەكی ئامادەكرییە.
