عێراق دێ بڕیارا قه‌ده‌غه‌كرنا تیكتۆكی ده‌ركه‌ت
هەولێر، قائید میرۆ:
وه‌زیرا گه‌هاندنا عێراقێ دیار کر کو پرۆژه‌یه‌ك به‌رهه‌ڤكریه بۆ قه‌ده‌غه‌كرنا تیكتۆكی ل سه‌رانسه‌ری عێراقێ، ژبەرکو تیكتۆكی زیانێن مه‌زن گه‌هاندینە جڤاكی و كاره‌ساتێن مه‌زن په‌یدا كرینه، ژلایەکێ دیڤە جێگرێ سه‌رۆكێ لیژنا گه‌هاندنێ ل په‌رله‌مانێ عێراقێ بۆ رۆژناما ئه‌ڤرۆ گۆت: وه‌زاره‌تا گه‌هاندنا عێراقێ هه‌تا نوكه چو بڕیارێن روهن نینن و باشتره تیكتوک بهێته كۆنتڕۆلكرن نه‌ك قه‌ده‌غه‌كرن.
هه‌یام یاسری، وه‌زیرا گه‌هاندنا عێراقێ راگه‌هاند، كار لسه‌ر گرتنا تیكتۆكی دهێته‌كرن ل عێراقێ، ژبه‌ركو زیانێن مه‌زن گه‌هاندینە ئاسایشا جڤاكی و خێزانێ، پڕۆژه‌یه‌ك هاتیه هنارتن بۆ په‌رله‌مانێ عێراقێ، هه‌تا وه‌كی قانوون بهێته په‌سه‌ندكرن و بڕیار لسه‌ر بهێته‌دان و گۆت: وه‌زاره‌تا گه‌هاندنێ ژی دێ ئه‌ڤێ قانوونێ جێبه‌جێ كه‌ت و تیكتۆكی قه‌ده‌غه كه‌ت.
هەیامێ گۆت: ئه‌م چاڤه‌ڕێی په‌رله‌مانی دكه‌ین ده‌نگی لسه‌ر ئه‌ڤێ پڕۆژه قانوونی بده‌ت، بدیتنا مه تیكتۆك ئه‌گه‌ره بۆ تێكدانا خێزانا عێراقی و په‌یداكرنا توندوتیژیان دناڤبه‌را تاكێن جڤاكی، تیكتۆك بویه ئه‌گه‌رێ ژێكجودابوونا خێزانێ و كاره‌ساتێن جڤاكی په‌یداكرینه.
ئیبراهیم میرانی، جێگرێ سه‌رۆكێ لیژنا گه‌هاندنێ ل په‌رله‌مانێ عێراقێ بۆ رۆژناما ئه‌ڤرۆ دیار كر، هه‌تا نوكه چو پڕۆژه لدۆر گرتنا تیكتۆكی نه‌گه‌هشتینه لیژنا گه‌هاندنێ و وه‌زاره‌تا گه‌هاندنا عێراقێ ژی چو بڕیارێن دروست و ئاشكرا نه‌داینه و گۆت: هەکە هاتو بڕیارا گرتنا تۆڕه‌كا جڤاكی یانژی تیكتۆكی بهێته ده‌ركرن و ئاماژه ب خالێن بڕیارێ بهێنه كرن و به‌هانه‌یێن دروست هه‌بن بۆ گرتن یان قه‌ده‌غه‌كرنا تیكتۆكی ل عێراقێ، پێدڤیه ئه‌گه‌ر بهێنه دیاركرن بۆ قه‌ده‌غه‌كرنا تیكتۆكی و دووڤدا دانوستاندن لسه‌ر بهێته‌كرن.
میرانی د بەردەوامیا ئاخفتنێن خۆدا گۆت: ده‌ستپێكێ دڤێت بزانین کو به‌هانه‌یێن بەرئاقل هه‌نه بۆ قه‌ده‌غه‌كرن و گرتنا تیكتۆكی، خاله‌كا دی بزانین كی ل گرتنا تیكتۆكی دێ زه‌ره‌رمه‌ند بیت و كی دێ مفادار بیت، چونكه دڤێت بۆ مه خۆیا بیت مه‌ره‌م ژ گرتنا تیكتۆكی چیه و دێ چو مفایه‌ك بۆ وه‌لاتیان هه‌بیت، خاله‌كا دیا گرنگ ئایا وه‌زاره‌تا گه‌هاندنێ شیانێن گرتن و قه‌ده‌غه‌كرنا ئه‌ڤێ تۆڕا جڤاکی هه‌نه یان نە، ژبه‌ركو هەکە بڕیاره‌كا وه‌سا بهێته‌دان شیانێن گرتنێ ژی هه‌بن و دووڤدا ئه‌م وه‌كی لیژنه دێ بڕیارا خۆ ده‌ین، هەکە پڕۆژه بهێته په‌رله‌مانی هینگێ لیژنا گه‌هاندنێ دێ گه‌نگه‌شه كه‌ت.
ئیبراهیم میرانی گۆتژی: ئه‌ز دگه‌ل كۆنتڕۆلكرنا تیكتۆكی دامه نه‌ك قه‌ده‌غه‌كرنێ، ب دیتنا من بهێته كۆنتڕۆلكرن باشتره، ژبەرکو هەکە ل پاشه‌رۆژێ زیان بۆ وه‌لاتیێن عێراقێ یان ئاسایشا عێراقێ هه‌بن داکو لبن كۆنتڕۆلێ بیت، هەکە بڕیارا قه‌ده‌غه‌كرنا تیكتۆكی بهێته‌دان دڤێت به‌ری ده‌ركه‌فتنا بڕیارێ عێراق هزر لڤێ چه‌ندێ بكه‌ت دێ چو كارڤه‌دان هه‌بن، نابیت به‌ری ده‌ركرنا بڕیارێ هزر ل كارڤه‌دانان نه‌هێته‌كرن، له‌وانه‌یه تیكتۆك بهێته قه‌ده‌غه‌كرن ل دادگه‌هێ سكالا لسه‌ر حوكمه‌تا عێراقێ بهێته تۆماركرن و وی ده‌می دێ ئاریشه هێشتا مه‌زنتر بیت.
