ئەڤرۆ خول و كۆپا كوردستانێ دێ هێنە كرن
زاخۆ، عەلی حاجی:
چاڤەڕێ دهێتە كرن ئەڤرۆ ل دەمژمێر 3:30 ئێڤاری یاریێن گەڕا 28ێ و بەری دووماهییا خولا پلا نایابا كوردستانێ ب ئەنجامدانا شەش یارییان بهێتە كرن، هەروەسان یارییا قۆناغا چارگۆشەیا زێرین یا كۆپا كوردستانێ ژی بهێتە كرن.
زاخۆ چاڤ ل دەربازبوونێ یە و دێ شەڕی بۆ سەركەفتنێ كەن پێخەمەت دەستڤە ئینانا پلێتا دووماهیێ و بەر ب ناسناڤی، بەناڤ ئەحمەد ڕاهێنەرێ تیما زاخۆ بەرهەڤییا تیما خوە دیار كر و گۆت: د كۆپا كوردستانێ پلان و بەرنامە نە وەكو یا خولێ یە و ئارمانجا مە سەركەفتنە و دەربازبوونە بۆ یارییا دووماهیێ، تیما مە ب ئاست و مۆرال یا بەرهەڤە، ب هیڤی نە بشێن سەركەفتنێ بینن و دلێ جەماوەرێ خوە كەیفخوەش بكەین، یاری بەرانبەر چو تیم بیت ب سانەهی نینە دڤێت شەڕی هەتا دووماهیێ بۆ سەركەفتنێ بكەین.
ژلایەكێ دووڤە بڕیارە ئەڤرۆ شەش یاری ژ گەڕا 28ێ یا خولا پلا نایابا كوردستانێ بڤی شێوەیی بهێنە كرن، شەقلاوە- ئاكرێ، شێروانە- چوارقۆرنە، دەربەندیخان- سیروانی نوو، ڕزگاری- هەولێر، هندرین- پێشمەرگەیا هەولێر، پێشەسازی- برایەتی، یارییا ڕانیە و سەیدسادق ناهێتە كرن ژبەر خوەڤەكێشانا سەیدسادق ژ خولێ و زاخۆ دڤێ گەڕێ دا یا چاڤەڕێ كرییە.
بۆ زانین یانەیا شێروانە بەری دەستپێكرنا ڤێ گەڕێ ناسناڤێ خولێ یا مسۆگەر كری ب كۆمكرنا 53 خالان ئەوا یانەیا زاخۆ ب 43 خالان رێزا دویێ دهێت و یانەیا ئاكرێ ب35 خالان رێزا شەشێ دهێت.
