سەرۆك بارزانی پێشوازییا قارەمانێن كەنداڤی كر
قەیس وەیس:
ل پێنج شەمبییا بۆری سەرۆك بارزانی ل سەلاحەددین پێشوازییا ستاڤێ یانەیا دهۆك یا وەرزشی كر پشتی شیاین ب سەرفەرازی ناسناڤێ كۆپا كەنداڤی ب دەستڤەبینن، ئەوا ب ئامادەبوونا د. عەلی تەتەر پارێزگارێ دهۆكێ، د. ئەحمەد قاسم سەرۆكێ لژنەیا ئۆلمپی تایێ دهۆك و د. عەبدوللا جەلال سەرۆك یانەیا دهۆك، دڤێ دیدارا دیرۆكی دا سەرۆك بارزانی ب گەرمی خێرهاتنا شاندێ یانەیێ كر و پیرۆزباهیێن سەركەفتنێ و ب دەستڤە ئینانا كۆپا كەنداڤی ئاراستەیی هەموو ئامادەبوویان كر و دەستخوەشییا هەموو یاریزانان كر ژبەر رۆلێ وان بۆ دەستڤە ئینانا ڤی ناسناڤی.
د پەیڤا خوە دا سەرۆك بارزانی كەیفخوەشییا خوە دیار كر ب دەستڤەئینانا ڤی ناسناڤی و رۆلێ وەرزشێ و وەرزشڤانان د ناڤا گەلان داب لند نرخان و گۆت: هوون دشێن ژ سیاسەتێ زێدەتر و باشتر دۆزا گەلێ خوە ل جیهانێ بدەنە نیاسین، سەرۆك بارزانی پشتەڤانییا خوە بۆ یانەیا دهۆكێ و هەموو وەرزشڤانێن كوردستانێ ب گشتی دوپاتكر و هیڤییا سەركەفتنێ و بەردەوامیێ بۆ خواست د هەموو چالاكیێن خوە دا.
دووڤدا شاندێ یانەیا دهۆك سۆپاس و پشتەڤانییا سەرۆك بارزانی و خەمخورییا وی یا بەردەوام بۆ وەرزشێ كر و ئەوچەندە ژی دیاركر پشتەڤانییا جەنابێ وی بۆ ئەگەر تیم ب هەموو مۆرالا خوە یاریێ بۆ ناسناڤی بكەن، هەروەسان كۆپا كەنداڤێ و درێسەكێ تایبەت دگەل درێسەكێ ئیمزایێن هەموو یاریزانان وەكو دیاری پێشكێشی سەرۆك بارزانی هاتە كرن، دووڤدا خەلاتێ سەرۆك بارزانی بۆ هەموو شاندێ یانەیێ هاتە بەلاڤكرن ژبەر دەستكەڤتا وان یا دیرۆكی.
دووڤدا شاندێ یانەیا دهۆك بەر ب بارەگایێ مەكتەبا سیاسی یا پارتی دیموكراتی كوردستان چوون، ئەوێن ژلایێ فازل میرانی بەرپرسێ كارگێرییا مەكتەبا سیاسی یا پارتی و سیداد بارزانی، مەحمود محەمەد ئەندامێن دەستەیا كارگێری و زەعیم عەلی ئەندامێ مەكتبا سیاسی پێشوازییا شاندێ یانەیێ كر، ئەوێن ژلایێ خوە ڤە پیرۆزباهییا دەستكەفتێ دهۆكێ كرین و خەلاتێ بوها پێشكێش وان كری.
د دیدارەكێ دا د. عەبدوللا جەلال سەرۆكێ یانەیا دهۆك گۆت: دیدارەكا تایبەت و مێژووی بوو و خوەش بوویە بۆ هەموو شاندێ یانەیا دهۆك، بناڤێ جەماوەرێ یانەیا دهۆك ئەم ژدل سۆپاسییا جەنابێ سەرۆك بارزانی دكەین نەبتنێ پشتی ڤێ یاریێ، بەلكۆ بەری ڤێ یاریێ ب خووربینی دۆڤچوونا تیما مە دكر و مە سۆزدا بوو جەنابێ سەرۆكی ئەم ب گیانەكێ مەزنتر یاریێ بكەین و ڕاهێنەری ژی سۆزدابی كۆپایێ ب دەستڤە بینن و بۆ جەنابێ وی بكەینە دیاری، سۆپاس بۆ خۆدێ ئەم شیاین ناسناڤی ببەین.
هەروەسان ناڤهاتی گۆت: جەنابێ وی دەستخوەشی ل هەموو یاریزانان كر و زوور كەیفخوەش بوو ب دەستكەفتێ یانەیا دهۆك، راستی ژی هەستەكا تایبەت و خوەش بوو ئەم شیاین ناسناڤێ كۆپا كەنداڤی بۆ جارا ئێكێ ل سەر ئاستێ هەرێما كوردستانێ ب دەستڤە بینن، هەروەسان گۆتنێن سەرۆك بارزانی ئەم زێدەتر پالداینە بۆ هەردو چالاكیێن دی خولا ستێرێن ئیراقێ و كۆپا ئیراقێ زێدەتر خوە زەحمەت بدەین و كار بۆ باشترین بەرهەڤیێن هەڤڕكییا بۆ دەستڤە ئینانا هەردو ناسناڤان و ئەم جارەكا دی سۆزا ب دەستڤە ئینانا ناسناڤان بدەینە جەنابێ وی، پێنەڤێت پشتەڤانییا بەردەوام یا مەسرۆر بارزانی سەرۆكێ حوكمەتا هەرێما كوردستانێ ژی ئەگەرێ مەزنە كو ئەم شیاینە پێنگاڤێن باش پاڤێژن و ئەڤی ناسناڤی ژ بدەستڤە بینن.
كۆپا كەنگی دەستپێكرییە و كێ ناسناڤ دەستڤە ئیناینە؟
بۆ جارا ئێكێ قارەمانییا كۆپا كەنداڤی ل سالا 1982ێ ب پشكدارییا پێنج یانەیان بوو، یانەیا عەرەبی یا كوێتێ ئێكەم ناسناڤی دەستڤە ئینابوو، ب گشتی 30 جاران قارەمانی هاتیە كرن، ل 12 جاران هاتییە هەلوەشاندن یان ژی نە هاتییە ئەنجامدان، یانەیێن شەباب، ئەهلی و ئیتفاق یێن سعۆدیێ پترترین ناسناڤ برینە ئەوژی هەر ئێكی سێ جاران، ژلایێ خوەڤە قادسیە یا كوێتی دو جاران ب دەستڤە ئینایە ل سالێن 2000 و 2005 بوویە، ژلایێ خوەڤە یانەیا دهۆك وەكو ئێكەم یانەیا كوردستانێ و ئیراقێ چوو د دیرۆكا قارەمانێن كۆپا كەنداڤی دا.
چەند یاریزانێن دهۆكێ گۆل كربوون
ب گشتی 10 یاریزانێن تیما یانەیا دهۆكێ گۆل تۆمار كرینە و بڤی شێوەیی بوون ئەو ژی پیتەر گۆرگیس، یانیك زاكێری، مارلۆن دیسانتۆس هەر ئێك دو گۆل هەنە، هەروەسان بەیار ئەبۆبەكر، ئیبراهیم غازی، پاشەنگ عەبدوللا، كەریم دەرویش، زوئەلفەقار، رۆبێن ئەكۆا و سیابەند عەگید هەر ئێك گۆلەك تۆماركریە ژلایەكێ دووڤە فدراسیۆنا فوتبۆلا كەنداڤی كوڕێ باژێرێ ئاكرێ و ستێرا یانەیا دهۆك یێ هێلا ناڤین هارۆن ئەحمەد وەكو باشترین یاریزان د قارەمانیێ دا دەستنیشانكر، هەروەسان گۆلپارێزێ یانەیا قادسیە خالد ئەلرەشیدی باشترین یگۆلپارێزێ قارەمانیێ دەستنیشانكرن.
