رۆسیا کاریگەریێ ل دانوستاندنێن ئەمریکا و ئیرانێ دکەت
وەزیرێ دەرڤە یێ ئیرانێ پشتی سەرەدانا رۆسیا کری سەبارەت ب دانوستاندنێن ل گەل ئەمریکا د داخویانیەکێ دا دیار کر، ئەو وەکو ئیران وەسا دبینن نیەتا ئەمریکا یا باش نینە، چونکی هندەک داخوازیێن ئەمریکا هەنە ب چو رەنگەکێ ژ ئالیێ ئیرانێ ڤە ناهێنە قەبوول کرن و هەکە هەلوەستێ ئەمریکا وەسا بیت دانوستاندن ناگەهنە چو ئەنجامەکێ و بەرپرسیارێ وێ ژی بێگومان ئەمریکا یە.
ل ئالیێ دی هژمارەک ژ چاڤدێرێن سیاسی یێن ئیرانێ دیار دکەن، رۆسیا نەڤێت دانوستاندنێن نها د ناڤبەرا ئیرانێ و ئەمریکا دا بێی پشکداریا وێ بەردەوام بن، چونکی ئەو یەک د بەرژەوەندیا رۆسیا دا نینە و ژ بەر ڤێ یەکێ ژی پشتی سەرەدانا عەباس ئیراقچی وەزیرێ دەرڤە یێ ئیرانێ بۆ رۆسیا هەلوەستێ وی وەلاتی سەبارەت ب دانوستاندنێن ل گەل ئەمریکا هاتیە گوهۆڕین و ئەو یەک ب چو رەنگەکێ د بەرژەوەندیا ئیرانێ دا نینە.
