ئەلهۆیێن چیا گەشبینن كارەبا بەغدایی قوتبكەن
قەیس وەیس:
بڕیارە ئەڤرۆ سێ یاریێن مایی ژ هەڤڕكیێن گەڕا 29ێ یا خولا ستێرێن ئیراقێ یا فوتبۆلێ، ئەو هەردو یانەیێن كوردستانێ دهۆك و هەولێر دێ ژ دەرڤەیی یاریگەهێن خوە بزاڤێن سەركەفتنان كەن، یارییا سێیێ دێ دناڤبەرا حدود و یانەیا كەرخ یێن بەغدایی بیت.
دهۆك دێ بزاڤێن قەرەبوویا خالان كەن
چاڤەڕێ دهێتە كرن ئەڤرۆ ل دەمژمێر 7:30 شەڤ تیما فوتبۆلا یانەیا دهۆكێ ل یاریگەها زەورا ل پایتەختێ ئیراقێ بەغدا ببیتە مێڤانا یانەیا كارەبا د چارچووڤەیێ یاریێن گەڕا 29ێ دا، ئەلهۆیێن چیا ئەوێن ل حەفتییا بۆری ب سەرفەرازی شیاین بۆ جارا ئێكێ د دیرۆكا ئیراقێ و كوردستانێ دا ناسناڤێ قارەمانا كۆپا كەنداڤی ب دەستڤە بینیت، لێ د یارییا گەڕا 28ێ یا بەری چار رۆژان دا بەرانبەر یانەیا حدود د ناڤ ئەرد و جەماوەرێ خوە دا دو خال ژ دەستدابوون، د نوكەدا ب شێوەكێ بەروەخت دهۆك ب41 خالان رێزا هەشتێ دهێت و كارەبا 34خالان رێزا 15ێ دهێت، بۆ یارییا ئەڤرۆ كادرێ ڕاهێنانێ و هەموو یاریزان ڕژدن قەرەبوویا خالان بكەن.
یاریێن دهۆكێ یێن پاشئێخستی
ژبەركو تیما فوتبۆلا یانەیا دهۆكێ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ كۆپایێ ب دەستڤە بینت، د دەمێ قارەمانیێ دا فدراسیۆنا فوتبۆلا ئیراقێ دەلیڤە دابوو دهۆكێ یاریێن وێ بهێنە پاشئێخستن بوخاترا ئەڤێ قارەمانیێ كو سەرجەمێ و بوونە شەش یاری و ب ڤی رەنگی، بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا و یارییا شەشێ مێڤاندارییا یانەیا مینا یە بەسرایی بكەت.
گۆلكەرێن ئەلهۆیێن چیا د خولێ دا
تیما دهۆكێ خوانا دەهـ یاریزانێن پشكداری د تۆماركرنا 30 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش چار گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
هەولێر گەشبینە ب سەركەڤتن ڤەگەڕیتە پایتەختی
ژلایێ خوەڤە یانەیا هەولێر ئەوا 35 خال هەین دێ ژ دەرڤەیی یاریگەها خوە ل باژێرێ رۆمادی بیتە مێڤانا یانەیا ئەلگەرمە خودانا 37 خالان ئەوا دێ ل دەمژمێر 7:30 شەڤ هێتە كرن، ئەڤ یارییە بۆ كوڕێن كەلهە و منارە گەلەك یا گرنگە پێخەمە ڤەگەڕیان بۆ رێزێن باشتر و ڕاوەستیانا ژ دەستدانا خالان و خوە دووركرن ژ رێزبەندیێن مەترسی یێن داكەڤتنێ.
