ل زاخۆ حەفتیانە گولچیسكێن ٦٥ نەخۆشان بێ بەرانبەر دهێنە شووشتن
زاخۆ، دلۆڤان هالۆ:
پێشتر نەخۆشێن گولچیسكان ل ئیدارەیا سەربخوە یا زاخۆ بۆ شووشتنا گولچیسكێن خوە قەستا پارێزگەها دهۆكێ دكرن، لێ د نوكە دا پشكا شووشتنا گولچیسكان ل نەخوەشخانا هاوارهاتنا زاخۆ هاتیە ڤەكرن و نەخوەش چارەسەریا خوە ل وێرێ وەردگرن، و حەفتیانە گولچیسكێن ٦٥ نەخۆشان بێ بەرامبەر دهێنە شووشتن.
دكتۆر سیروان ئەحمەد، ڕێڤەبەرێ گشتی یێ ساخلەمیا زاخۆ بۆ ڕۆژناما ئەڤرۆ دیار كر كو حەفتیانە ل پشكا شووشتنا گولچیسكان ل نەخوەشخانا هاوار هاتنا زاخۆ گولچیسكێن ٦٥ نەخوەشان بێ بەرامبەر دهێنە شووشتن، چونكی تێچوویا هەر نەخوەشەكێ بۆ شووشتنا گولچیسكان ل نەخوەشخانێن نە حكومی نێزیكی 180 دولارانە، و ل نەخوەشخانێن حكومی ژی دناڤبەرا 200 بۆ 300 هزار دیناران دكەڤیتە سەر ملێ حكومەتێ، ئەڤە ژی بارگرانیەكا مادییە بۆ نەخوەشان.
ئەحمەد محەمەد، بسپۆرێ دل و هناڤانە ل پشكا شووشتنا گولچیسكان ل نەخوەشخانا هاوارهاتنا زاخۆ گۆت:»ئەم چارەسەرییا وان نەخوەشان دكەین یێن كو گولچیسكێن وان كارناكەن یان ژی لاوازن، و ڕۆژانە ل دووڤ خشتەیەكێ دیاركری چارەسەرییا نەخوەشان دكەین».
یوسف ئیسماعیل، شەش سالە تووشی نەخوەشیا گولچیسكان بوویی و حەفتیانە سێ ڕۆژان بۆ دەمێ سێ دەمژمێران گولچیسكێن وی دهێنە شووشتن، ئەو دبێژیت:»ژبەری كو پشكا شووشتنا گولچیسكان ل نەخوەشخانا هاوار هاتنا زاخۆ بهێتە ڤەكرن، ئەم نەچار د بووین بچینە دهۆكێ، لێ نوكە چارەسەرییا مە بێ بەرامبەر دهێتە كرن، و كارمەندێن نەخوەشخانێ گرنگیێ ب مە ددەن و ڕێزێ ل مە دگرن، و سۆپاسیا حكومەتێ دكەین كو ئەڤ پشكە ل زاخۆ ڤەكرین».
