هاتنا گەشتیاران كاریگەریەكا مەزن ل سەر زێدەبوونا داهاتێ هەرێما كوردستانێ هەیە
هەولێر، قائید میرۆ
بسپۆرەكێ ئابوری ئاشكراكر، زێدەبوونا رێژا گەشتیاران بۆ هەرێما كوردستانێ كاریگەریەكا مەزن ل سەر زێدەبوونا داهاتێ هەرێما كوردستانێ هەیە و گۆت ژی: ئەم پشتڕاستین ئەگەر ب زمانێن بیانی ریكلام بهێتەكرن، ئەڤە دێ هاتنا گەشتیاران ل وەلاتێن جیهانێ بۆ جهێن گەشتیاری یێن هەرێما كوردستانێ زۆر بەرەف زێدەبوونێ ڤە بچیت.
د. كاوە عەبدولعەزیز، بسپۆرێ ئابوری بۆ رۆژناما ئەڤرۆ دیار كر» هاتنا گەشتیاران بۆ هەرێما كوردستان سال بۆ سالێ بەرەف زێدەترە، ئەڤە ژی بۆ پەیداكرنا ژێرخانا گەشتیاری ل هەرێما كوردستانێ ڤەدگەڕیت، ب تایبەتی راكێشانا گەشتیارێن بیانی و نێڤدەولەتی، چونكە ئەگەر بەری نوكە گەشتیارێن سەرەدانا هەرێما كوردستانێ دكر ل پارێزگەهێن باشوور و ناڤەڕاستا ئیراقێ بوون، خۆشحالیڤە نوكە گەشتیار ل وەلاتێن جودا یێن جیهانێ سەرەدانا هەرێما كوردستانێ دكەن.
زێدەتر گۆت: ژلایێ ئابوری ڤە هاتنا گەشتیاران كاریگەریێن راستەوخۆ ل سەر كەرتێ ئابوری و گەشەكرنا ئابورا هەرێما كوردستانێ هەیە، ژبەركو هەر گەشتیارەكێ دهێتە هەرێما كوردستانێ گوژمەكێ مەزن یێ پارەی د مەزێخیت و هاتنا گەشتیاران دەلیڤا كاری بۆ هژمارەكا بەرچاف یا وەلاتیان پەیداكریە.
ئەو یەك ژی دیار كر، حوكمەتا هەرێما كوردستانێ ئاسانكاریێن زۆر بۆ هاتنا گەشتیاران كرینە ب رێیا نڤسینگە و كۆمپانیێن گەشتیاری بەردەوام كار بۆ ئاسانكرنا ئینانا گەشتیاران دهێتەكرن، ژبەر ئارامیا هەرێما كوردستانێ و هەبوونا هژمارەكا زۆرا دەڤەرێن گەشتیاری بەردەوام گەشتیار دخوازن سەرەدانا هەرێما كوردستانێ بكەن، خەلكێ مە ژی كاریگەری ل سەر راكێشانا گەشتیاران هەیە، چونكە جڤاكێ كوردی رێزێ ل گەشتیاران دگریت و ئەو رێز و پێشوازیا گەرما خەلكی ئەگەرەكە بۆ هاتنا گەشتیاران، دەمێ گەشتیارەك دهێتە هەرێما كوردستانێ ئەڤێ رێز و ڤیانا خەلكێ كوردستانێ دبینیت بۆ مێهڤانان ئێكسەر دەمێ ڤەدگەڕیت بۆ وەلاتێ خۆ ریكلامەكا باش بۆ هەرێما كوردستانێ دكەت و زۆر گەشتیارێن دی ژی ژبەر ئەڤێ رێزگرتنێ دێ سەرەدانا هەرێمێ كەن.
د. كاوە عەبدولعەزیز ئاماژە كر «مخابن ئەگەر ل سالێن بۆری ژبەر كاودانێن هەرێما كوردستانێ تێدا دەربازبووی حكوومەت نەشیابیت وەك پێدڤی خزمەتا گەشتیاران بكەت، نوكە زێدەتر دەلیڤە هەیە و پڕۆژە دهێنە ئەنجامدان ل دەڤەرێن گەشتیاری، یا خۆیایە ئالۆزیێن دەڤەرێن سنوری و ئەو قەیرانێن چەند سالێن بۆری هۆكاربوون حوكمەتا هەرێمێ نەشیا گرنگیێ ب جهێن گەشتیاری بدەت، بەلێ بەرۆڤاژی رێكێن دەڤەرێن گەشتیاری هاتینە چێكرن و د چوارچوڤێ نەخشێ وەبەرهێنانێ گرنگیەكا زۆر ب پڕۆژێن گەشتیاری هاتیەدان.
ئاشكرا ژی كر، سیاسەتا حوكمەتا هەرێما كوردستانێ ئەڤە ژێدەرێن داهاتی جوراو جور بكەت و ئێك ژ وان كەرتێن مفا هەیە بۆ زێدەكرنا داهاتی كەرتێ گەشتیاریە، هژمارەكا وەلاتێن جیهانێ ژێدەرێ وان یێ سەرەكی گەشت و گوزارە، هەرێما كوردستانێ ژی 12 جورێن گەشت و گوزارێ هەنە هەر ژ گەشت و گوزارا ئاینی و كەلتووری بگرە، هەتا گەشت و گوزارا ساخلەمی و زڤستانێ، ئەگەر بهێت و ب زمانێن بیانی ریكلام بۆ گەشت و گوزارا هەرێما كوردستانێ بهێتەكرن ئەڤە ئەم پشتڕاستین دێ ل وەلاتێن جودا یێن جیهانێ گەشتیار سەرەدانا هەرێما كوردستانێ بكەن و ل داهاتی ژی ببیتە ژێدەرەكێ بهێز یێ ئابوری و داهاتێ هەرێمێ زێدەبیت ب رێیا كەرتێ گەشت و گوزارێ.
