ئەڤرۆ پێشانگەها بەرزەبوو هاتە دیتن دێ هێتە ڤەكرن
كۆڤان ئێحسان، ئێكە ژ رێڤەبەرێن پرۆژێ پێشانگەها بەرزەبوو هاتە دیتن، بۆ رۆژناما ئەڤرۆ دبێژیت: ئەڤ پرۆژە پووتەیی ب كلتۆر و شوونوارێن مە ددەت، ئەوێن بەر ب نەمانێ ڤە دچن و ئەوێن بەرزە بووین، بێی كو ئێك ئاڤریەكێ لێ بدەت، گەلەك ژ وان كلتۆران یێن ژناڤ دچن، بێی كو ئەم هەستپێ بكەین، بۆ نموونە خانیێ كوردەواری، كو پرۆژێ منە، زێدەباری چەندین پرۆژەیێن دی یێن هونەری، وەكی چێكرنا گوسكان ب رێكێن كەڤنار، بێی چێكرنا كارگەهان، كو نوكە ل دەڤەرا بەهدینان ب تنێ كەسەك ڤی كاری دكەت، دیسان كۆمەكا دی یا كارێن هونەری هەنە، كو دەربڕینێ ژ پاراستن و ڤەژاندنا ڤان كلتۆران دكەن، چونكی ئەڤ كلتۆرە پشكەكە ژ جڤاك و میراتێ باب و باپیرێن مە.
هەروەسا گۆت: ئەڤ پرۆژە بەری سالەكێ ژلایێ من و مامۆستا وەلیدێ ستییێ ڤە هاتیە پێشكێشكرن بۆ سازییەكا ئەمریكی ب ناڤێ( تاری) پشتەڤانیا ڤان پرۆژەیان دكەت، ب رێیا وی مە شیایە بودجەكی بۆ خوە پەیدا بكەین، ئەڤە دەمەكێ درێژە ئەم كار ل سەر دكەین و ئەڤە جارا ئێكێ یە، گەلەریەك وەكو كەلەپۆر ل عیراقێ و هەرێما كوردستانێ دهێتە پێشكێشكرن، ئارمانجا مە ئەوە، ب رێیا ڤی كاری پتر كلتۆر و شوونوار و ئاڤەدانیا كەڤنار ب پارێزین، هەروەسا 11 هونەرمەند و ڤەكۆلەران پشكداری د ڤێ پێشانگەهێ دا كریە، ب پرۆژەیێن جودا ڤە، زێدەباری كو بۆ دەمەكێ درێژ ئەڤ پێشانگەهە مینیتە ڤەكری و خەلك دشێن سەرەدانا وێ پێشانگەهێ بكەن و كو ئەڤرۆكە رۆژا دوشەمبی ئەڤ پیشانگەهە ل گەلەریا دهۆكێ دێ هێتە ڤەكرن، مە ڤیایە پتر بهایێ ڤان تشتێن كلتۆری دیار بكەین ب رێیا ڤێ پێشانگەهێ، دیسا مامۆستا وەلید هونەرمەندەكێ جیهانیە و ل وەلاتێ بریتانیا خواندیە و ئێك ژ وان كەسێن شوینتبلێن وی د دیار ل سەر ئاستێ جیهانێ، من وەكو كلتۆرناسەك و وی ژی وەكو شارەزایەكێ هونەری مە پێكڤە كاركریە.
